Rejîma Sûriyê nirxê nan û mazotê zêdetirî du qatan bilind kir

PeyamaKurd -  Hikûmeta Şamê nirxê gelek tiştên sereke yên jiyanê wek nan, şekir û mazotê zêdetirî du qatan bilind kir.

Wezareta Bazirganiya Sûriyê bi biryareke nû bihayê nan û mazotê bi rêjeyeke bilind zêde kir. Li gor biryara nû, nirxê nan ji 100 Lîreyên Sûrî kir 200 Lîre û nirxê lîtra mazotê jî ji 180 Lîreyî kir 500 Lîreyên Sûrî.

Li gor wezaretê, ev biryar li gor nivîseke ji Wezareta Petrol û bi şêwirmendiya bi Komîta Aborî re hatiye dayîn.

Krîza nan û cureyên petrolê li herêmên jêr kontrola rejîmê nehatiye çareser kirin û ji dema salekê ve ye mazot li ser xelkê nehatiye belavkirin.  27 meha borî jî hikûmeta Sûriyê nirxê şekir û birinc ji sedî 66 bilind kiribû.

Serokê Sûriyê Beşar Esed bi fermanekê mûçeyên karmendên sivîl û leşkeran ji sedî 50î zêde kir, lê karmendên hikûmetê nikarin di çarçoveya vê bihabûnê de debara xwe bi vî mûçeyî bikin.