Hevpeymaniya Navdewletî: Tu zêdebûn di qebareya hêz û binkeyan de nîn e

PeyamaKurd –  Di derbarê avakirina binkeyeke nû li Dêrikê, Berdevkê Hêzên Hevpeymaniya Navdewletî peyamek belav kir û got, tu zêdebûn di hêz û binkeyên wan ên li Dêrikê tune ye. Ev daxuyanî bersiva hin raporên ajansa SANAyê ne.

Li gor Berdevkê Hevpeymaniya Navdewletî Wayne Marotto li ser Twittera diyar kir: “Erkê Hevpeymaniya Navdewletî li bakurê rojhilatê Sûriyê, nehatiye guhartin. Hevpeymaniya Navdewletî ligel hevpeymana xwe Hêzên Sûriyeya Demokratîk, kar ji bo jinavbirina DAIŞê dike.”

Marotto herwiha got: “Hevpeymaniya Navdewletî, bi awayekî rêkxistinkirî gerên ewlehiyê encam dide, ji bo dubare gihandina kelûpelan bo karwanan li herêma ewlehiyê li rojhilatê Sûriyê û piştevanîkirin û bihêzkirina binkeyan.”

Di dawiya twîtê de da zanîn: “Tu zêdebûn di qebareya hêz û binkeyan de nîn e.”

Ajansa fermî ya Sûriyê “SANA” çend rojên borî belav kiribû, Amerîka li Dêrikê dest bi avakirina binkeyeke nû kiriye.