Yekîtiya Ewropa ji bo sivikirin û rakirina cezayên ser Sûriyê civiya: Nexserêyek tê amadekirin

PeyamaKurd - Wezîrên Derve yên welatên endamên Yekîtiya Ewropayê (YE) li Brukselê ji bo sivikirin û rakirina cezayên li ser Sûriyê civiyan. Tê çaverêkirin, nexşeyeke nû ji bo cezayên li ser Sûriyê were danîn.

Hate ragihandin ku di rûniştina Rojhilata Navîn a civînê de, sivikirina qonax bi qonax a dorpêçên Yekîtiya Ewropayê yên ser Sûriyê hate gotûbêjkirin.

Li gorî zanyariyan, wê dorpêçên li ser qadên wekî veguhastin û enerjiyê ku rê li ber avakirina Sûriyeyê digirin bi şert werin rakirin.

Beriya civînê Nûnera Bilind a Siyaseta Derve û Ewlehiyê ya Yekîtiya Ewropayê û Alîkara Serokê Komîsyona Ewropayê Kaja Kallasê ragihand ku endamên YE dikarin li ser nexşerêyeke sivikirina dorpêçên li ser Sûriyeyê li hev bikin.

Wezîrê Derve yê Fransa  Jean-Noel Barrot jî berî destpêkirina civînê got ku ew dê li ser rakirina cezayên ser fînans, enerjî, gihandinê biryarê bidin.