Rojava | Li Hesekê 14 ji wan DAISî 47 kes hatin girtin

PeyamaKurd – Di encama operasyonên hêzên asayîşên yên li Rojavayê Kurdistanê de, 47 kes hatin girtin ku 14 ji wan endamên DAIŞê ne.

Navenda Ragihandinê ya Hêzên Ewlekariya Hundirîn (Asayîş) bi daxuyaniyeke nivîskî ragihand: "Hêzên me barbanga roja duşemê operasyoneke ewlehiyê ya berfireh ji Hesekê heta Şedadê li dar xist. Di encamê de 47 kes ku derbarê wan de lêgerîn hebûn, hatin girtin. Kesên hatine girtin 14 endamên DAIŞ’ê ne, 3 endamên komên çekdarên girêdayî Tirkiyê ne û 31 endam ên komên xirabker bûn. Li gel wan miqdareke çek û madeyên hişbir hatin dîtin.”

Derbarê çek û madeyên hatine bidestxistin û wiha hate gotin:

3 çekên ji cureya Brno,12 kalaşnîkov, 7 narincok, 20 cercûrên kalaşnîkovan, 8 demançe, 10 guleyên demançeyan, 2 laptop, 50 guleyên BKS’yan, 3 gram madeya hişbir a crystal hbose, 30 gram heşîşa hişbir, 9 cercûrên demançeyan, 20 hebên hişbir ên Tramadol, 5 alavên bikaranîna hişbirê, rextek, 3 dûrbînên leşkerî, 7 çifteyên nêçîrê, kêrek, parçeyên xerabe yên kalaşnîkovan.