YNK besdarî merasîma sondxwarina Serokê Herêma Kurdistanê dibe

PeyamaKurd - Piştî bidawîhatina civîna Polîtbûroya YNKê, berdevkê wê partiyê aşkere kir, sibe şandeke bilind a YNKê wê beşdarî merasîmê sondxwarina Serokê Herêma Kurdistanê bibe.

Berdevkê Fermî yê Yekîtiya Niştimanî ya Kurdistanê (YNK) Letîf Şêx Omer ji medya Kurdistanê re ragihand, sibe şandeke bilind a YNKê bi serokatiya Cîgirê Sekreterê Giştî Kosret Resûl û endametiya Erselan Bayîz, Hakim Qadir, Omer Fetah li ser vexwandina fermî ya PDKê beşdarî merasîma sondxwarina Serokê Herêma Kurdistanê dibe.

Biryar e sibe 10ê Hezîranê Parlemantoya Kurdistanê bicive û di wê civînê de merasîma sûndxwarina Nêçîrvan Barzanî wek Serokê Herêma Kurdistanê bihê kirin.

Ji bo beşdariya di sûndxwarina Serokê Herêma Kurdistanê ji aliyê komîteke taybet ve vexwandin ji her sê serokatiyên Iraqê û serokên firaksiyonên Parlemantoya Iraqê û nûner û balyozên welatên biyanî yên li Iraqê re hatine şandin.