Amerîkayê nameyeke tund şand: Daxwaza hilweşandina Heşdî Şeibî dike

PeyamaKurd – Li gorî nûçeya Radyoya Monte Carloyê ya navneteweyî ku dispêre çavkaniyên siyasî yên Iraqê, Dewletên Yekbûyî yên Amerîkayê nameyeke nû û çarenivîssaz ji bo "Çarçoveya Hemahengiyê" şandiye.

Di vê nameyê de Washington daxwazên pir tund û bingehîn ji hikûmeta Bexdayê û aliyên şîe yên desthilatdar dike. Amerîka bi zelalî daxwaz dike ku Iraq peywendiyên xwe yên siyasî li gel Îranê bi temamî qut bike û dawî li bandora Tehranê ya li ser biryarên siyasî yên Iraqê bîne.

Ev daxwaz di demekê de ye ku rageşiya navbera Washington û Tehranê gihîştiye lûtkeyê, wekî zexteke mezin li ser Bexdayê tê nirxandin.

Yek ji xalên herî girîng û nîqaşbar di nameya Amerîkayê de, daxwaza hilweşandina hemû komên çekdar û bi taybetî "Desteya Heşdî Şeibî" ye.

Washington van hêzan wekî amûrên bandora Îranê û astengên li pêşiya serweriya dewleta Iraqê dibîne. Amerîka tekez dike ku ji bo aramiya herêmî û parastina serweriya Iraqê, divê hemû hêzên çekdar ên li derveyî artêş û polîs werin hilweşandin û çekên wan werin radestkirin.

Ev daxwaz rasterast li dijî binesaziya leşkerî ya aliyên Çarçoveya Hemahengiyê ye ku bingeha hêza wan li ser van koman ava bûye.

Di berdewamiya nameyê de, Amerîkayê vebijarkeke stratejîk pêşkêşî Iraqê kiriye û diyar kiriye ku eger Bexda van daxwazan bi cih bîne, dikarin peymaneke hevpar a ewlehî û leşkerî ya demdirêj pêk bînin.

Bi vê peymanê, Amerîka soz dide ku piştgiriya serweriya Iraqê bike û wê ji her cure desttêwerdanên dervayî biparêze.

Ev name nîşan dide ku Washington dixwaze Iraqê ji eniya Îranê qut bike û wê bixe nava sîstema xwe ya ewlehiyê ya li Rojhilata Navîn, ku ev yek dikare bibe sedema guhertineke mezin û radîkal di nexşeya siyasî ya Iraqê de.