'Tirkiye êrîs bike, wê DAIS xwe ji nû ve ava bike û dîsa bibe gef ji cîhanê re'

PeyamaKurd - Hevserokê Desteya Hundir a Birêveberiya Xweser a Bakur û Rojhilatê Sûrî Elî Heco, li ser gefxwarin û amadekariyên destwerdana Tirkiyê bo Rojavayê Kurdistanê metirsiya ji bo hejmara mezin a girtiyên DAIŞê anî ziman.

Heco li ser metirsiya girtiyên DAIŞê yên di destê HSDê de ji medya herêmê re wiha axivî:

“Çi êrîş li dijî herêmê pêk were, wê xerabî û ne aramî xwe bide der, nemaze ku hejmareke mezin a terorîstên DAIŞê di gitîgehên HSDê de ne. Ev jî wê bihêle, kontrolkirin zehmet be û DAIŞ di rêya çeteyên xwe yên girtî û şaneyên razayî re, xwe ji nû ve ava bike. Bi vê jî wê tadarî li giştî cîhanê bibe.”

Heco bi bîr xist ku berî 2 rojan, fermandarê giştî yên Hêzên Sûriya Demokratîk (HSD) Mezlûm Ebdî jî heman tişt anîbû ziman û wiha got: “Bi êrîşa dewleta Tirk re, wê DAIŞ ji berê mezintir û bihêztir bibe.”

Elî Heco diyar kir ku “dewleta Tirk bi behaneya ku herêma bakur û rojhilatê Sûrî gefekê jê re çêdike, dixwaze erdê me dagir bike. Lê belê, ew ji projeya Netewa Demokratîk bixwe ditirse.”