Donald Trump peyamek li ser Cejna Remezanê belav kir

PeyamaKurd - Serokê Dewletên Yekbûyî yên Amerîkayê Donald Trump diyar kir ku Remezan "ji bo gelek Amerîkiyan pîroz e" û ev serdem nirxên hevpar ên wekî dilovanî û dilnizmiyê xurt dike.

Di peyamekê de ku li ser malpera Qesra Spî hatiye weşandin, Trump ji bo Remezanê ji Misilmanên Amerîkî re axivî.

Trump di peyama xwe de destnîşan kir ku Remezan mehek nûjenkirin û hizirkirina giyanî ye û ev îfade bi kar anîn:

"Remezan demek pîroz e ji bo spasdariya ji bo bereketên bêhejmar ên Xwedê. Ji bo gelek Amerîkiyan, ev dema pîroz nimêj û rojîgirtinê ronî dike, têkiliyên malbat û civakê xurt dike û nirxên me yên hevpar ên dilovanî, xêrxwazî, rehm û dilnizmiyê ji nû ve piştrast dike."

Trump diyar kir ku "mafê îbadetê yê bi azadî, ku ji hêla Xwedê ve hatiye dayîn," taybetmendiyek diyarker a neteweya Dewletên Yekbûyî ye û hêmanek bingehîn a dewlemendî û hêza welêt e.

Di berdewamiya peyama xwe de, Trump tekez kir ku rêveberiya wî hewl dide ku hemû welatî bikaribin bi azadî baweriya xwe pêk bînin û got, "Di vê demsala xêr û xweşîyê de, ez duayên xwe ji bo bextewarî û aştiyê li malan, yekîtî û aştiyê li cîhanê, û di sala pêş de serfiraziyê pêşkêş dikim."