Stenbol | Dayikên Kurd bi 'Laçikên Spî' çûn meydana 1ê Gulanê

PeyamaKurd - Roja Cîhanî ya Karkeran 1ê Gulanê li bajarê herî mezin ê Tirkiyê Stenbolê ku bi sed hezaran karkerên Kurd lê hene hat pîroz kirin.

Partiyên siyasî, rêxistinên civakî û sendîkayên karkeran li Stenbolê li meydana Bakirkoy Yekê Gulanê pîroz dikin.

Hevserokên HDPê Sezaî Temellî û Pervîn Buldan jî di mîtinga 1ê Gulanê de beşdar bûn û ligel 'Dayikên Aştiyê' ji bo balê bikişînin ser grevên birçîbûnê yên berdewam dikin, bi laçikên spî meşiyan heta meydana pîrozbahiyên 1ê Gulanê.

Hat ragihandin ku HDPê ji bo meş û ahenga 1ê Gulanê ya Stenbolê 7 hezar laçikên spî belav kirine.

17 KES HATIN BINÇAVKIRIN

Gelek kesên ku dixwestin li Taksîmê ji bo 1ê Gulanê bicivin ji aliyê polîsan ve hatin astengkirin û li gor raportên medyayê heta niha 17 kes hatine binçavkirin.

Parêzgariya Stenbolê destûra fermî neda ku li Taksîmê mîtinga 1ê Gulanê were lidarxistin. Tenê ji bo meydana Bakirkoy a Stenbolê destûr derket ku hemû partî û saziyên civakî digel sendîkayên karkeran li wir civiyan.

PeyamaKurd / Stenbol