Hişyariya ji bo Washingtonê: Êrîşeke piçûk jî çêdibe ku bibe sedema şerekî mezin

PeyamaKurd – Li gorî raporên çapemeniya Amerîkayê, nexasim Wall Street Journalê, Serok Donald Trump vebijarka êrîşeke leşkerî ya sînorkirî li dijî Îranê dinirxîne da ku Tehranê neçarî peymaneke nû ya nukleerî bike.

Di vê plana Trump de tê pêşbînîkirin ku heke Îran daxwazên Amerîkayê red bike, êrîş dê gav bi gav werin zêdekirin. Lê belê analîstên leşkerî û siyasî hişyarî didin ku şansê serkeftina vê stratejiyê kêm e; ji ber ku şertên Trump ên mîna bidawîkirina temamî ya bernameya nukleerî di berdêla tenê rawestandina cezayên nû de, ji bo Tehranê wekî "teslîmbûnê" tê dîtin û nayê qebûlkirin.

Rêveberiya Tehranê bi zelalî ragihandiye ku ew ê bersiveke pir tund bidin her cure êrîşekê, heta eger ew êrîş sembolîk an biçûk be jî.

Îran di wê baweriyê de ye ku eger li ber zextên leşkerî serî bitewîne, dê şiyana xwe ya astengkirinê û hêza xwe ya mûşekên balîstîk bixe xeterê û li hember Îsraîlê lawaz bibe. Ji ber vê yekê, tê çaverêkirin ku Îran di şerekî mihtemel de serî li rêbazên neasîmetrîk bide. Di nav van senaryoyan de girtina Tengava Hirmuzê, hedefgirtina tesîsên petrolê yên herêmê û êrîşên li ser baregehên Amerîkayê hene ku dikarin bihayê petrolê li cîhanê bigihînin asta herî bilind.

Analîz nîşan didin ku tevlîheviya stratejiya Washingtonê ya ji bo bilindkirina aloziyê û nêzîkatiya Tehranê ya "teslîmbûn nayê qebûlkirin", metirsiya karesatekê diafirîne.

Êrîşeke ku wekî "bisînorkirî" dest pê bike, dikare bi lez bibe şerekî herêmî yê berfireh ku encamên wê yên giran ji bo aboriya cîhanê û aramiya Rojhilata Navîn hebin.

Herwiha tê tekez kirin ku gaveke wisa ya leşkerî hîna ji aliyê Kongreya Amerîkayê ve nehatiye destûrkirin û di warê hiqûqa navneteweyî de jî dê bibe sedema nîqaşên mezin, lewma her gava leşkerî ya Trump dikare bibe destpêka reaksiyoneke zincîrî ya bêveger.