Îsraîl: Erdogan û Lapid, dê hevdîtinekê bikin

PeyamaKurd- Ji aliyê Ofîsa Serokwezîrtiya Îsraîlê ve hat ragihandin ku dê Serokwezîrê Îsraîlê û Serokomarê Tirkiyeyê, li Civata Giştî ya Neteweyên Yekbûyî (NY), hevdîtinekê bikin.

Di daxuyaniya ku hat dayîn de hat destnîşankirin ku dê Serokwezîrê Îsraîlê Yair Lapid û Serokomarê Tirkiyeyê Recep Tayip Erdogan, di Lûtkeya Civata Giştî ya 77an a NYê ku dê di hefteya sêyemîn a îlonê de li New Yorkê çêbibe de hevdîtinekê bikin.

Li ser mijara hevdîtinê, Reutersê nûçeyek belav kir û da zanîn ku hevdîtin dê ji bo sererastkirina têkiliyên nebaş, gavekî girîng be.

Ji ber ku mijara Filîstinê her dem di rojevê de ye, di navbera Tirkiye û Îsraîlê de ji ber vê yekê dem bi dem acizî çêdibin û herî dawî di sala 2018an de herdu welatan jî balyozên hev û din dersînor kiribûn.

Di meha borî de jî ji aliyê rayedarên Tirkiyeyê ve hatibû ragihandin ku balyozên herdu welatan dê car din dest bi kar bikin.