CENTCOM: Li Sûriyê serkirdeyekî diyar ê DAISê hat desteserkirin

PeyamaKurd - Fermandariya Hêzên Navendî ya Amerîkayê (CENTCOM) ragihand, bi rêya helîkopterê di nava 48 demjimêrên borî de sê êrîşên cuda li rojhilatê Sûriyê û bi ser çekdarên DAIŞê de hatine kirin û serkirdeyekî diyar ê DAIŞê hatiye desteserkirin.

CENTCOMê di daxuyaniya xwe de eşkere kir, di çarçoveya 3 êrîşên cuda yên ser baregeh û pêgehên DAIŞê de, li rojhilatê Sûriyê pênc çekdarên DAIŞê û serkirdeyekî diyar ê rêxistinê hatin desteserkirin.

CENTCOMê diyar kir, yek ji wan kesên hatiye desteserkirin, destê wî di êrîşan de li Sûriyê hebûye û serkirdeyekî diyar ê rêxistin DAIŞê ye.

Hêjayî gotinê ye, Hêzên Sûriya Demokratîk (HSD) jî doh Sêşemê ragihandibû ku di encama operasyonên hevbeş ên ligel Hevpeymaniyê de, berpirsekî DAIŞê hatiye girtin.