YPG: Em van gefan cidî werdigirin û em ji bo rûbirûbûna her êrîseke bejayî amade ne

PeyamaKurd – Rêveberê Navenda Ragihandinê ya YPGê Siyamend Elî diyar kir, “Heta niha me tu kombûneke mezin a [hêzên Tirkiyê] ji bo êrîşa bejayî nedîtiye.” û anî ziman, “Em van gefan cidî werdigirin û em ji bo rûbirûbûna her êrîşeke bejayî amade ne.”

Siyamend Elî di hevpeyvînekê de da zanîn ku her êrîşeke wiha ya ji aliyê Tirkiyê ve pêwîstî bi "çiraya kesk" a hêzên Hevpeymaniya Navdewletî ya li dijî DAIŞê, Amerîka yan Rûsyayê heye, "Heger nebe ew nikarin êrîşeke bejayî bikin.”

Siyamend Elî eşkere kir, di 7 rojên borî de 15 şervan û hejmarek sivîl di encama êrîşên balafdirên Tirkiyê de can dane ku ji wan 11 sivîl li santrala elektrîkê ya li bajarê Dêrikê can dan.