Aloziya li ser sînorê Ûkraynayê gihîst asta ser: Dengê teqînan kêm nabe!

PeyamaKurd – Di nav du rojên dawî de, rageşiya li ser sînorê Ûkraynayê gihîştiye asteke xeter ku tê ragihandin, dengê teqînan ranaweste û pevçûn jî rû didin.

Li gorî medya rûsî hêzên Ûkraynayê îro danê sibehê hewla êrîşekê bo herêma Luganskê dane û bi ser neketiye.

Ajansa Reutersê jî ragihandiye ku li Donetsk a rojhilatê Ûkraynayê ku di bin kontrola alîgirên Rûsyayê de ye, dengê teqînên bihêz hatine bihîstin.

Li aliyê din medya rûsî bi binpêkirina agirbestê aliyê Ûkraynayê tawanbar dike û aliyê Ûkraynayê jî serhildêrên Donetsk û Luganskê tawanbar dike.

Herwiha çavkaniyên medya rûs dibêjin, ji wan herêmên navborî 40 hezar sivîl hatine tehlîyekirin û li herêma Rostov a Rûsyayê hatine bicihkirin.

Rêveberiya Amerîkayê jî vê rageşiya ku gihîştiye asta pevçûnan wekî rêxweşkirina Rûsyayê û avakirina hincetên bo dagirkirina Ûkraynayê dinirxîne.