Berya seredana Biden Mahmûd Abbas û Benny Gantz hevdîtinekî pêkanîn

PeyamaKurd –Berya serokê Amerîkayê Joe Biden dest bi geryana xwe ya Rojhilata Navîn bike û tevlî zîrwa welatên Kendavê li Erebistan a Si’ûdiyê bibe, wezîrê bergiriyê yê Îsraîlê Benny Gantz û serokê Fîlîstînê Mahmud Abbas li Şerîa Rojava li Ramallahê hatin cem hev.

Gantz hevdîtina li Ramallahê di ser hesabê xwe yê Twitterê de ragihand û got ku hevdîtin bi erênî derbas bûye, li ser rewşa sîvîlan û mijara ewlehiyê rawestiyane. Gantz weha got:

“Ji bo koordînasyona ewlehiyê û berlêgirtina tevgerên ku rewşê xerab dikin, me biryarê da ku em di nav têkiliyan de bin.”

Mahmud Abbas jî daxwuyaniyekî da û got ku ji bo ber li xerabûna rewşê bigrin, divê li pey peymanên nivîskî herin.

Li gor çapemeniya Îsraîlê; dibe ku rayedarên Îsraîlê tevlî zîrwa Erebistanê ya ku mijara wê şerê Ûkraynaye û hevkariya enerjiyê ye, bibe.

Rêxistina Îslamî ya Cîhadê hevdîtina navbera Gantz û Abbas şermezar kir û got:

“Hevdîtinên ewlehiyê xizmetê ji bo berjewendiyên dijmina dike.”