Sûdanî bi Mîrê Êzîdiyan re civiya

PeyamaKurd – Serokwezîrê Iraqê Mihemed Şiya Sûdanî bi Mîrê Êzîdiyan Mîr Hazim Tehsîn Beg re civiya.

Ofîsa Ragihandinê ya Serokwezîrê Iraqê do Sêşemê 24ê Çileya 2023an, bi daxuyaniyekê diyar kir: “Serokwezîrê Iraqê Mihemed Şiya Sûdanî pêşwazî li Mîrê Êzidiyên li Iraq û cîhanê Mîr Hazim Tehsîn Beg û şanda pê re kir ku ji nûnerên pêkhateya Êzîdî yên li parlamentoyê û hejmarek ji zanayên olî û şêx û navdarên Êzîdî pêk hatibû.”

Hat ragihandin, di hevdîtinê de Mihemed Şiya Sûdanî ragihandiye ku şanazî û rêza wî ya mezin ji bo vê pêkhateya qurbanîder heye û eşkere kiriye, avakirina Şingal û deşta Neynewa ji armancên hikûmeta Iraqê ye.

Di berdewamiyê de Sûdanî destnîşan kiriye, avakirin û pêşkêşkirina xizmetguzariyan, mercê seqamgîrbûna navçeyê ye.

Herwiha ji bo biryara tapokirina milkên li Şingalê, Mîr Hazim Tehsîn Beg spasî û pêzanînên peyrewên ola Êzîdî ji Serokwezîrê Iraqê re gihandiye.

Herî dawî hat diyarkirin, şanda Kurdên Êzîdî ji Sûdanî daxwaz kiriye ku serdana Şingalê û perestgeha Lalişê bike. Mihemed Şiya Sûdanî soz daye ku vê daxwaza wî di demeke nêz de cîbicî bike.