HDP: Derbarê encamên hilbijartinê û nameya Ocalan daxuyaniyek da

PeyamaKurd - Hevserokê HDPê Sezai Temeli ragihand ku, wan nameya Abdullah Ocalan rast nirxandiye û ji ber vê yekê jî li Stenbolê ev encam hatiye wergirtin.

Hevserokê Partiya Demokratîk a Gelan (HDP) Sezai Temelli, bo malpera Almanî DWyê axivî û got, di hilbijartinên Stenbolê de dengderên Kurd roleke sereke lîstine û ew nêzîkatiya Şaredarê Stenbolê Ekrem Îmamoglu jî erênî dibînin.

'ME NAMEYA OCALAN RAST NIRXANDIYE'

Temelli got, desthilat li şûna ku pirsgirêkan çareser bike, bi HDPê ve mijûl dibe û da zanîn, wan nameya Abdullah Ocalan rast nirxandiye û ji ber vê yekê jî li Stenbolê ev encam hatiye wergirtin.

Hevserokê HDPê Temelli dibêje, pirsgirêka Kurdî pirsgirêka sereke ya Tirkiyê ye û aliyên nikaribin vê çareser bikin, ew dê nikarin di desthilatê de jî bimînin.

Wî da xuyakirin, pergala rêveberiya Tirkiyê xetimî ye û divê çêkirina destûreke nû bê rojevê.