Berdevka Baregeha Barzanî: 'Rola Serok Barzanî ji bo Êzidiyan berçav û diyar e'

PeyamaKurd - Berdevka Baregeha Barzanî Xalîde Xelîl, ragihand ku Rola Serok Barzanî ji bo Êzidiyan berçav û diyar e, lê Êzidî niha ji ber hebûna komên neyasayî nikarin vegerin Şingalê.

Xalîde Xelîl ji K24ê re gotiye: “Rola Serok Barzanî ji bo Êzidiyan berçav û diyar e û bi berdewamî piştevaniya Êzidiyan kiriye. Di sala 2015an de Şingal li ser destê Serok Barzanî hat rizgarkirin û êzdî jî bi destê cenabê wî hatin rizgarkirin.”

Berdevka Baregeha Barzanî diyar kir: “Mixabin piştî rizgarkirina Şingalê, ew navçe ketiye destê hinek aliyan û rewşa wê niha ne aram e. Ji ber wê jî hikûmeta Herêma Kurdistanê û hikûmeta Iraqê ji bo asayîkirina rewşa Şingalê û vegera xelkê wê rêkeftina Şingalê îmze kirin.”

Berdevka Baregeha Barzanî da zanîn, heta niha rêkeftina Şingalê nehatiye cîbicîkirin û komên neyasayî, milîs û PKK li wir mane, ku bûne asteng li pêşiya vegera xelkê wê bo mal û milkên xwe.

Xalîde Xelîl bibîr xist: “Hin alî li Bexdayê hene rê li ber cîbicîkirina rêkeftina Şingalê digrin. Em ligel wê yekê ne ku xelk bi awayekî xwebexş vegerin warên xwe. Ne wek hikûmeta Iraqê û Wezareta Koç û Koçberan ku dixwazin xelkê Şingalê bi zorê ji kampên Herêma Kurdistanê vegerînin.”

Herwiha Xalîde Xelîl got: “Serok Barzanî û hikûmeta Herêma Kurdistanê bi berdewamî alîkarîya xelkê Şingalê kirine û di kampan de hemû pêdawîstiyan ji wan re dabîn kirine.”

Hêjayî bibîrxistinê ye, teroristên DAIŞê li roja 3ê Tebaxa 2024an êrîşî Şingalê kiribûn û Êzidiyên Şingalê û wê deverê hatibûn jenosîd kirin. Di wê êrîşê de, teroristên DAIŞê zêdetirî 6500 jin û zarokên Êzidî revandin û zêdetirî 350 hezar kesên din jî koçberê kampên Herêma Kurdistanê bûn. Herwiha nêzî 2500 Êzidiyan jî heta niha winda ne.