Li bakur berfa biharê

PeyamaKurd - Bi hatina Biharê re ku bendeyî li germbûna hewayê bû, lê belê li bakurê Kurdistanê pêleke berfê destpê kir.

Li parêzgehên Qers, Colemêrg, Erzirom û Erdexanê ji nû ve berf barîya û ji duh ve barîn didome. Li van parêzgehan, bi şevan pileya germahiyê dadikeve bin sifirê.

Li gor daneyên Saziya Keşnasiyê ya Tirkiyeyê, şeva borî li Erziromê pileya germahiyê daketiye -3 pileyan.

Herwiha li parêzgeha Qersê jî sitûriya berfê gihiştiye nêzîkî 10 santîmetreyan û ji ber rewşa keşûhewayê li ser rêyên Qers, Îdir, Qers û Erdexanê çûn û hatin zehmet bûye.

Bi heman awayî li parêzgeha Erdexanê jî ji şeva borî ve berf dibare û ji ber sir û seqemê rêyên bajêr qeşa girtiye.

Hat ragihandin ku tîmên paqijkirina berfê li ser rêyên qeşagirtî xwê direşînin.

Li Colemêrgê jî barîna berfê dest pê kiriye û ji ber vê yekê Saziya Keşnasiyê doh hişyarî dabû ku wê li 10 parêzgehan berf û baran bibare û divê tedbîrên pêwîst bên wergirtin.