Mezlûm Ebdî: Em li Helebê gihîştin lihevkirina agirbestê

PeyamaKurd- Fermandarê Giştî yê Hêzên Sûriyeya Demokratîk (HSD) Mezlûm Ebdî, derbarê êrîşên li ser taxên Kurdan ên Helebê yên Eşrefiye û Şêx Meqsûdê de daxuyanî da û ragihand ku bi navbeynkariya aliyên navneteweyî lihevkirinek pêk hatiye.

Ebdî diyar kir ku ev lihevkirin rê li ber agirbestê vedike û armanc dike ku êrîş û binpêkirinên li dijî sivîlên li taxên Şêx Meqsûd û Eşrefiyeyê bên rawestandin. Ebdî, destnîşan kir ku ev pêngav ji bo parastina xelkê herêmê hatiye avêtin.

Peyama Mezlûm Ebdî wiha ye:

"Bi navbeynkariya aliyên navneteweyî ya ji bo rawestandina êrîş û binpêkirinên li dijî xelkê me yê li Helebê, em gihîştin lihevkirinekê ku rê li ber agirbestê vedike.

Ev lihevkirin derxistina şehîd, birîndar, sivîlên asêmayî û şervanan ji taxên Eşrefiye û Şêx Meqsûdê ya ber Bakur û Rojhilatê Sûriyeyê ve misoger dike.

Em bangî navbeynkaran dikin ku pêbendî sozên xwe yên rawestandina binpêkirinan bin û ji bo vegera ewle ya koçberan a li malên wan bixebitin.

Silaveke bi rûmet ji bo berxwedêrên Şêx Meqsûd û Eşrefiyeyê, şehîd, heval û malbatên wan û sivîlên ku li ber xwe daye.

Em sersaxiyê ji xwe, ji malbatên şehîdan û gelê xwe re dixwazin û hêviya şîfaya lezgîn ji birîndaran re dikin."

Li gorî hûrgiliyên lihevkirinê, wê derketina cenaze, birîndar û sivîlên ku di nava taxan de asê mane, bi awayekî ewle ber bi herêmên Bakur û Rojhilatê Sûriyeyê ve bê dabînkirin. Herwiha, şervanên ku li wan taxan li ber xwe didan jî wê di çarçoveya vê peymanê de vekişin.