Gelê Mûsilê spasiya Kurdistanê dike

PeyamaKurd - 21ê Adarê di roja ewil a Newrozê de belemeyek li girava geştyarî ya li devera Xabat a Mûsilê li ser çemê Dîcleyê ketibû bin avê û di encama bûyerê de heta niha termên zêdetirî 100 kesan ji nav avê hatin derxistin û hejmareke mezin jî hîn winda ne.

Li ser xwedîderketin, hawarî û helwesta Herêma Kurdistanê gelek niştecihên Mûsilê li ser medya civakî peyamên spasiyê belav kirin.

Şewket Cibûrî li ser medyaya civakî got: “Kesên resen in û xwedî helwesta pir şanaz in, dema tu bajarên Kurdistanê û sîstema birêvebirina wan dibînî, dizanî ku ew hêjayî dewletê ne, Xweda Kurdistanê û gelê wê biparêze.”

Rehîme Nueymî got: “Spas bo Herêma Kurdistanê û gelê wê, helwesta wan hêjayî şanaziyê ye di asta xelkê Mûsilê de.”

Luey Mihemed diyar kir: “Gelek spas, helwesta pir bi şanazî ji sala 2014an heta niha, Xweda we biparêze.”

 Karvedanên niştecihên Mûsilê û deverên din naverast û başûrê Iraqê li ser helwesta Encûmena Wezîran a Hikûmeta Herêma Kurdistanê berdewam in û di pêngava herî nû de hejmarek ji Kurd û Erebên Neynewa li ber Parêzgariya Duhokê civiyan û spasî û pêzanînên xwe pêşkeşî Herêma Kurdistanê kirin.