Hikûmeta Kurdistanê 5 proje pesend kirin

PeyamaKurd – Piştî civîna îro 28ê Nîsanê ya Encûmena Wezîran a Herêma Kurdistanê bi serokatiya Serokwezîrê Herêma Kurdistanê Mesrûr Barzanî daxuyaniyek hat belavkirin.

Di daxuyaniyê de hat ragihandin ku di beşa yekem a civînê de Wezîrê Darayî û Aborî Awat Şêx Cenab û Wezîrê Plandanînê Dara Reşîd raportek li ser hejmarên herî dawî yên proje budçeya Herêmê ya sala 2021ê pêşkêş kirin.

Encûmena Wezîran biryar da ku lijneyek were pêkanîn, da ku têbînî û pêşniyarên Encûmenê di nav projeyasayê de were bicîkirin û piştre ji bo pesendkirina dawî ya Encûmena Wezîran were amadekirin û ji bo parlamentoyê were şandin.

Di beşa duyem a bernameya civînê de Cîgirê Serokwezîr Qubad Talebanî derencama civîna li ser rûbirûbûna hişkesalîyê pêşkêş kir ku tê de wezaretên pêwendîdar, parêzgehên Herêmê û îdareyên serbixwe pêşniyar û plan û karê pêşîne yê xwe pêşkêş kirine û wisa biryar e, hefteya bê, plana serarserî ji bo rûbirûbûna hişkesalî amade bibe, da ku li Encûmena Wezîran were pesendkirin û di derfeta herî nêzîk de bikeve warê cîbicîkirinê.

Di beşa dawî ya civînê de Encûmena Wezîran pênc proje yasa pesend kirin.