داعش لە عێراق چەند هێرشێکی ئەنجام دا
پەیامی کورد... داعش لە عێراق چەند هێرشێکی ئەنجام دا
شەوی ڕابردوو چەکدارانی داعش لە چەند پارێزگایەکی عێراق هێرشیان کردە سەر هێزە ئەمنییەکان و چەکدارانی حەشدی شەعبی بە هۆوە کوژراو و برینداری لێکەوتەوە.
بەپێی هەواڵی میدیا عێراقییەکان شەوی ڕابردوو، چەکدارانی داعش لە پارێزگاکانی دیالە، بەغدا و سەڵاحەدین هێرشیان ئەنجامداوە و بە هۆوە پێنج کەس کوژران و 18ی دیکەش برینداربوون.
باسیان لەوەشکردووە، تەنیا لە سامەڕا بەهۆی هێرشی چەکدارانی داعشەوە دوو ئەندامی سەرایا سەلام کوژراون کە یەکێکیان بەرپرسی هەواڵگریی گرووپەکەی حەشد بووە لەو ناوچەیە و سێ کەسی دیکەش برینداربوون.
هەروەها دوو چەکداری داعشیش کوژران لە وەڵامی ئەو هێرشەدا.
هەر بەپێی هەواڵی میدیا عێراقییەکان، لە هێرشەکەی داعش بۆ سەر گوندێکی دیالە پۆلیسێکی فیدراڵی کوژراوە و 11 کەسی دیکەش برینداربوون کە شەشیان ئەندامی یەک خێزانن.
لە ئەنجامی هێرشەکانی دیکەش لە سنووری شارۆچکەکانی خاڵس و سەلام بە هۆیانەوە چوار کەس برینداربوون و سێ کەسیش کوژران. لە وەڵامی هێز ئەمنییەکانیش چەکدارێکی داعش کوژراوە.