ژمارەی ئەو کەسانەی کە لە سوودان ئاوارەبوون 1.6 ملیۆن كهسی تێپەڕاند
پەیامی کورد... ژمارەی ئەو کەسانەی کە لە سوودان ئاوارەبوون 1.6 ملیۆن كهسی تێپەڕاند
رێکخراوی نێودەوڵەتیی کۆچ، بڵاویكردهوه ژمارەی ئەو کەسانەی لە سوودان لە دوای پێکدادانەکانی نێوان سووپای وڵاتهكه و هێزەکانی پشتیوانیی خێرا ماڵەکانیان جێهێشتووە یەک ملیۆن و 600 هەزاری تێپەڕاندووە.
بە پێی راپۆرتێكی رێکخراوی نێودەوڵەتیی کۆچ، لە ماوەی شەش هەفتەی رابردوودا بەهۆی پێکدادانەکان و کەشی نائارامەوە 1.2 ملیۆن کەس لە ناوەوەی وڵاتهكه ناچاربوون له شوێنی خۆیان بگۆڕن و 425 هەزار کەسیش هانایان بۆ وڵاتانی دراوسێ بردووە.
زۆرترین هەڵاتن لە سوودان بە 69% لە خەرتوومی پایتەخت روویداوە و لە دوای ئەو شارەوە، رۆژئاوای دارفوور بە رێژەی 20% دێت.
سوودانییەکان 64%ی ئەو کەسانە پێکدەهێنن کە بۆ میسر، لیبیا، چاد، کۆماری ئەفریقای ناوەڕاست، باشووری سوودان و ئیسیۆپیا هەڵاتوون و 36%ی هەڵاتووانیش لە بیانییەکان و ئەو کەسانە پێکدێن کە دەگەڕێنەوە وڵاتەکانیان.
هاوکات میسر، چاد و باشووری سوودان زۆرترین ئاوارە روویان تێکردوون.
لە وڵاتەکە کە بەهۆی پێکدادانەکانەوە هاوکارییە مرۆییەکان پەکیکەوتووە، پێداویستییەکی خێرای بە خۆراک، شوێنی حەوانەوە و پێداویستیی پزیشکی هەیە.
لایەنەکانی ململانێکە سەرەڕای ئەوەی چەندین جار ئاگەربەست راگەیەندراوە بەڵام پێکدادانیان لە ناوچە جیاجیاکان بەردەوامە.
سوپای سوودان ماوەیەک پاڵپشتیی هێزەکانی پشتیوانیی خێرای دەکرد بەڵام بەهۆی ئەوەی بەشێوەیەکی سەربەخۆ و وەک سوپایەکی هاوتەریب مامەڵەی دەکرد وەکو هەڕەشەیەک دەیبینی و داوایکرد لە ماوەی دوو ساڵدا بە تەواوەتی تێکەڵی سوپا ببنەوە. لەدوای راگەیاندنی هێزەکانی پشتیوانیی خێرا کە دوای 10 ساڵ لە پێکهێنانی حکوومەتێکی مەدەنی ئەو پێشنیازه قبوڵ دەکات، لێدوانە دژ بەیەکەکان و گرژییەکان روویان لە هەڵکشان کرد و لە بەیانی رۆژی 15ی نیساندا لە خەرتوومی پایتەخت و چەند شارێک پێکدادانی چەکداری دەستی پێکرد.
هێزەکانی پشتیوانیی خێرا کە لە ساڵی 2019دا لە سەردەمی سەرکۆماری پێشووی سوودان، عومەر بەشیر لە دارفوور لە دژی بەرهەڵستکاران و پاراستنی سنوور و دابینکردنی ئاسایش لە شێوەی میلیشیا پێکهێنرا و به تێپهڕینی كات زیاتر سەربەخۆ دەرکەوتن، هەزاران ئەندامی هەیە.
هاوکات رێکخراوی تەندروستیی جیهانی، ئەوەی راگەیاند لە سوودان بەهۆی ئەو پێکدادانەی کە بەردەوامە 850 کەس گیانیان لەدەستداوە و پێنج هەزار و 500 کەسیش برینداربوون.