زانیاری تازە دەربارەی تۆمارکردنی ناوی نوێ لە بەشە خۆراکی مانگانە
پەیامی کورد ... زانیاری تازە دەربارەی تۆمارکردنی ناوی نوێ لە بەشە خۆراکی مانگانە
بەڕێوبەری گشتی لە وەزارەتی بازرگانی حکوومەتی ھەرێمی کوردستان ڕایگەیاند : حکوومەتی عێراق ماوەی سێ ساڵە زیادکردنی ناوی لە بەشە خۆراکی مانگانە ڕاگرتووە و بڕیارە دوای تەواوبوونی پرۆسەی بەئەلیکترۆنیکردن دەرگای تۆمارکردنی ناوی تازە بکرێتەوە، بەڵام ھەر کەسێک کۆچی دوایی بکات ناوەکەی ڕەشدەکەنەوە.
نەوزاد شێخ کامیل، بەڕێوبەری گشتی لە وەزارەتی بازرگانی حکوومەتی ھەرێمی کوردستان، ڕایگەیاند : نزیکەی سێ ساڵە بە بڕیاری حکوومەتی عێراق تۆمارکردنی ناوی تازە بۆ بەشە خۆراکی مانگانە ڕاگیراوە و تازە نووسراوێکمان بە دەست گەیشتووە جارێ چاوەڕێ بکەین پرۆسەی بەئەلیکترۆنیکردنی پسوولەی خۆراک دەست پێ بکات و دواتریش دەست بە تۆمارکردنی ناوی تازە دەکرێت و دەرگای خۆتۆمارکردن دەکرێتەوە، ئەمەش بڕیاری حکوومەتی عێراقە.
نەوزاد شێخ کامیل ووتیشی: ژمارەی ئەوانەی زیاد دەکرێن زۆرن، ماوەی سێ ساڵە ئەوانەی لەدایک بوون ناویان تۆمار نەکراوە، بەڵام لە ماوەی ئەو سێ ساڵە ئەوەی کۆچی دوایی کردووە ناویان ڕەش کراوەتەوە.
ووتیشی: بۆ پرۆسەی بەئەلیکترۆنیکردنی فۆرمی خۆراک کۆمپانیاکان ئامادەکراون و لیژنە دیاریکراون، چاوەڕێ دەکرێت سەردانی شارەکانی عێراق و ھەرێمی کوردستان بکەن و دەست بە پرۆسەی بەئەلێکترۆنیکردن بکرێت، دواتریش ناوتۆمارکردن دەست پێ بکاتەوە.