مەسروور بارزانی پیرۆزبایی لە یەکیتی ئافرەتانی کوردستان دەکات

پەیامی کورد    ...   مەسروور بارزانی پیرۆزبایی لە یەکیتی ئافرەتانی کوردستان دەکات

مەسروور بارزانی، جێگری سەرۆکی پارتی دیموکراتی کوردستان پەیامێکی بە بۆنەی بۆنەی (٧٣)مین ساڵیادی دامەزراندنی یەکیتی ئافرەتانی کوردستان بڵاوکردەوە و دەڵێت: یەکیتی ئافرەتانی کوردستان لە ڕیزی پێشەوەی بەرگریکردن بوون لە مافەکانی ئافرەتان و مافە ڕەواکانی خەڵکی کوردستان و پشتیوانێکی بێ وێنەی ھێزی پێشمەرگەی کوردستان بوون.

پێنجشەممە، ١١ـی کانوونی یەکەمی ٢٠٢٥، مەسروور بارزانی، جێگری سەرۆکی پارتی دیموکراتی کوردستان بە بۆنەی (٧٣)مین ساڵیادی دامەزراندنی یەکیتی ئافرەتانی کوردستان پەیامێکی بڵاوکردەوە و ڕایگەیاند، گەرمترین پیرۆزبایی لە سکرتێر و ئەندامانی مەکتەبی سکرتاریەت و سەرجەم ئەندامانی یەکیتی ئافرەتانی کوردستان دەکەم و ھیوای سەرکەوتن و بەردەوامییان بۆ دەخوازم .

مەسروور بارزانی لە پەیامەکەیدا ئاماژەی بەوەشکرد، لە مێژووی گەلی کوردستان دا، یەکیتی ئافرەتانی کوردستان، ڕۆڵێکی گرینگ و پێشەنگی ھەبووە و ھەمیشە لە ڕیزی پێشەوەی بەرگریکردن بووە لە مافەکانی ئافرەتان و مافە ڕەواکانی خەڵکی کوردستان و پشتیوانێکی بێ وێنەی ھێزی پێشمەرگەی کوردستان بوون و نموونەیەکی گەشەی خەبات و قوربانیدان و گیان بەختکردن بوون لە پێناو مافەکانی گەلی کوردستان. ئەمە جیا لەوەی یەکیتی ئافرەتانی کوردستان، ڕۆڵێکی دیاریشی لە داکۆکیکردن لە مافەکانی ئافرەتان و پێگەیاندنی چەندین ئافرەتی سەرکردەدا ھەبووە.

جێگری سەرۆکی پارتی دەشڵێت، ھیوادارم یەکیتی ئافرەتانی کوردستان، لە ڕۆڵی پێشەنگانە و خەباتی ڕێکخراوەیی خۆی بەردەوام بێت بۆ بەدیھێنانی ئامانجەکانی لە پێناو زیاتر خزمەتکردنی ئافرەتانی کوردستان و بەرگریکردن لە ماف و داخوازییەکانیان.