نێچیرڤان بارزانی پیرۆزبایی لە یەکیتی ئافرەتانی کوردستان دەکات
پەیامی کورد ... نێچیرڤان بارزانی پیرۆزبایی لە یەکیتی ئافرەتانی کوردستان دەکات
نێچیرڤان بارزانی، لە یادی ٧٣ ساڵەی دامەزراندنی یەکیتی ئافرەتانی کوردستان دا، بە گەرمی پیرۆزبایی لە تەواوی ئافرەتانی کوردستان دەکات و دەڵێت، “پشتیوانی تەواوی خۆمان بۆ خەبات و چالاکییەکانی یەکیتی ئافرەتانی کوردستان دووپات دەکەینەوە لەپێناو بەدیھێنانی مافەکانیان و بەھێزکردنی پێگەی ئافرەت لە ناوەندەکانی بڕیار و بەڕێوەبردندا.
دەقی پەیامی نێچیرڤان بارزانی:
لە حەفتا و سێیەمین ساڵیادی دامەزراندنی دا، گەرمترین پیرۆزبایی ئاراستەی سکرتاریەت و ئەندامانی یەکیتی ئافرەتانی کوردستان و تەواوی ئافرەتانی کوردستان دەکەم.
یەکیتی ئافرەتانی کوردستان، وەک قوتابخانەیەکی گەورەی نیشتمانپەروەری و پێگەیاندن، مێژوویەکی پڕ لە سەروەری ھەیە. ئەم ڕێکخراوە تێکۆشەرە کە لەسەر بنەمای بیر و تێڕوانینی ڕێبازی بارزانی نەمر دامەزراوە، ھەمیشە بەشێکی دانەبڕاو و ھاوبەشێکی کارای خەباتی نیشتمانی، ھاوکات پێشەنگی خەباتی مەدەنی و کۆمەڵایەتی بووە.
لە ڕۆژانی سەختی شۆڕش دا، ئافرەتانی کوردستان نموونەی باڵای خۆڕاگری و قوربانیدان بوون، ئەمڕۆش لە قۆناغی ئاوەدانکردنەوە و گەشەپێداندا، ڕۆڵێکی کارا و کاریگەر لە بەڕێوەبردن و پێش خستنی کۆمەڵگەدا دەگێڕن. ئافرەتانی کوردستان سەلماندوویانە کە کۆڵەکەی سەرەکی کۆمەڵگەیەکی تەندرووست و پێشکەوتوون.
لەم یادەدا، پشتیوانی تەواوی خۆمان بۆ خەبات و چالاکییەکانی یەکیتی ئافرەتانی کوردستان دووپات دەکەینەوە لەپێناو بەدیھێنانی مافەکانیان و بەھێزکردنی پێگەی ئافرەت لە ناوەندەکانی بڕیار و بەڕێوەبردندا. بڕوای تەواومان ھەیە کە بەبێ بەشداری کارای ئافرەتان، کۆمەڵگە ناتوانێت بەرەو ئایندەیەکی گەشتر ھەنگاو بنێت.
سڵاو بۆ گیانی پاکی ئەو ئافرەتانەی لەپێناو ئازادی کوردستان و مافەکانیان دا گیانیان بەخشی.
ھیوای سەرکەوتن و پێشکەوتنی بەردەوام بۆ یەکیتی ئافرەتانی کوردستان دەخوازم.
نێچیرڤان بارزانی
٢٠٢٥/١٢/١١