لەدهۆک ژنێک بەهۆی دەرزییەوە گیانی لەدەستدا
پەیامی کورد... لەدهۆک ژنێک بەهۆی دەرزییەوە گیانی لەدەستدا
بەڕێوەبەرایەتیی گشتیی تەندروستیی دهۆک ڕایگەیاند، دوای گیان لەدەستدانی ژنێک بەهۆی لێدانی دەرزی، لێکۆڵینەوەیان دەستپێکردووە و کەسانی کەمتەرخەم و لایەنە پەیوەندیدارەکانی هێنانی ئەو دەرزییە رەوانەی دادگا دەکەن.
لەمبارەیەوە ئەمڕۆ پێنج شەممە بەڕێوەبەرایەتیی گشتیی تەندروستیی دهۆک لە ڕونکردنەوەیەکدا رایگەیاند: "دوای ئەوەی گیان لەدەستدانی ژنێکی تەمەن 35 ساڵیمان بیست کە بەهۆی دانانی دەرزی گیانی لەدەستداوە، لەسەر راسپاردەی وەزارەتی تەندروستی رێکارەکانی بەدواداچونمان لەسەر ئەو روداوە گرتووەتە بەر".
ئەوەش هاتووە : دوای لێکۆڵینەوەیان لەسەر گیان لەدەستدانی ئەو ژنە، کەسانی کەمتەرخەم و لایەنە پەیوەندیدارەکانی هێنانی ئەو جۆرە دەرزییە رەوانەی دادگا دەکەن.
ژنەکە ناوی (شەهریهان حەسەن) بووە و خەڵکی گوندی ئێکمالەی ناحیەی روڤیای سەر بە قەزای بەردەڕەشە، دوای ئەوەی شەوی ڕابردوو سەردانی نۆرینگەیەکی ناو سەنتەری ناحیەی روڤیای کردووە بۆ دانانی دەرزی، دواتر گەڕاوەتەوە ماڵەوە و رەوشی تەندروستیی تێکچووە و گیانی لەدەستداوە.