ڕێکاری نوێ بۆ بەرەنگاربوونەوە لەگەڵ کۆرۆنا دەگیرێتە بەر
پەیامی کورد ... ڕێکاری نوێ بۆ بەرەنگاربوونەوە لەگەڵ کۆرۆنا دەگیرێتە بەر
ئەندامێكی ژووری ئۆپراسیۆنی ھەولێر ووتی، سبەی لیژنەی باڵای كۆرۆنا لە ھەرێمی كوردستان كۆدەبێتەوە و تێیدا چەندین رێكاری نوێ دەردەكرێن، كە ئەمجارە كرانەوەیەكی باشتر دەبێت لە جاران و پێویستیشە ھاوسەنگییەك درووست بكرێت لە نێوان رووبەڕووبوونەوەی كۆرۆنا و باشتركردنی بار و گوزەرانی خەڵكدا.
سەرۆكی ئەنجوومەنی پارێزگای ھەولێر و ئەندامی ژووری ئۆپراسیۆنی ھەولێر، عەلی رەشید، رایگەیاند، بڕیار دراوە سبەی سێشەممە لیژنەی باڵای رووبەڕووبوونەوەی كۆرۆنا لە ھەرێمی كوردستان بە بەشداری پارێزگارەكان كۆبوونەوەی خۆی ئەنجام بدات و تێیدا كۆمەڵێك رێكاری نوێ بڕیاری لەبارەوە بدرێت.
عەلی رەشید ووتیشی، بە دڵنیاییەوە كۆمەڵێك گۆڕانكاری لە رێكارەكان دەكرێت و وەكوو ئەوەی ئێستا نابێت، بەڵام تاوەكوو رۆژی سێشەممە بە ھەمان رێكاری پێشوو كار بە رێنماییەكان دەكرێت، بەڵام لە ڕۆژی سێشەممەوە گۆڕانكاری زۆر دەكرێت، لەوانە كردنەوەی مزگەوتەكان و ھۆڵە وەرزشییەكان و گۆڕانكاری زۆر دەكرێت و كرانەوەیەكی باش دەبێت.
سەرۆكی ئەنجوومەنی پارێزگای ھەولێر ڕوونیشی كردەوە: "كۆرۆنا بووەتە بابەتێكی جیهانی و تا ئێستاش ھیچ واکسەنێک نەدۆزراوەتەوە، بۆیە زیاتر لەوە فشار بكەین ئابووری دادەڕمێت، لەبەر ئەوە پێویستە لەگەڵی بڕۆین و لە نێوان بار و گوزەرانی خەڵك و رووبەڕووبوونەوەی كۆرۆنادا، ھاوسەنگییەك درووست بكەین".
دەشڵێ: "دەوامی حكوومی دەبێت و تەنھا رۆژانی پێنجشەممە نابێت، بەڕێوبەرەكانیش سەرپشكن لە دەوامكردنی فەرمانبەران و لیژنەی باڵای كۆرۆناش رێنمایی نوێی سەبارەت بە دەوامكردن دەبێت.