دیالە.. چوار ئەفسەر و پاسەوانی سنوور کوژران

چوار ئه‌فسه‌رو پاسه‌وانی سنوور له‌ناحیه‌ی مه‌نده‌لی، ده‌كه‌ونه‌ بۆسه‌یه‌كی چه‌كدارە تیرۆریستەکانی داعشەوەو سەرجەمیان دەکوژرێن.
لەبارەی روداوەکەوە، ئازاد شه‌فی، به‌ڕێوه‌به‌ری ئه‌نجوومه‌نی ناحیه‌ی مه‌نده‌لی رایگه‌یاندووە، کە شه‌وی رابردوو له‌سه‌ر رێگای مه‌نده‌لی - به‌له‌دروز له‌ سنوری پارێزگای دیاله‌، چوار پاسه‌وانی سنوور كه‌ دوانیان ئه‌فسه‌رن،  له‌لایه‌ن چەکدارە تیرۆریستەکانی داعشه‌وه‌ ده‌ستڕێژی گوللەیان لێكراوه‌ و شەهیدکراون.
ئاماژەی بەوەشکردووە، کە ئه‌و چوار پاسەوانە به‌هۆی ئیشوكاری ده‌وامه‌وه‌، سه‌ردانی شاری باقووبه‌یان كردوه‌ و له‌ كاتی گه‌ڕانه‌وه‌یان كه‌وتوونه‌ته‌ بۆسه‌یه‌كی چه‌كدارانی داعش-ه‌وه‌ و كوژراون.
به‌ڕێوه‌به‌ری ئه‌نجوومه‌نی ناحیه‌ی مه‌نده‌لی، زیاتر روونیکردەوە، کە ئه‌و ناوچه‌یه‌ی پاسه‌وانه‌كانی تێدا كوژراون، ناوچه‌یه‌كی به‌رفراوانه‌ و چه‌كدارانی داعش تێیدا بوونیان هه‌یه‌و له‌ ماوه‌ی رابردوودا ژماره‌یه‌ك كرده‌وه‌ی تیرۆریستیان ئه‌نجامداوه‌.