سوپای ڕووسیا بەردەوامە لە کشانەوە لە چەند شارێکی ئۆکراینا

پەیامی کورد... سوپای ڕووسیا بەردەوامە لە کشانەوە لە چەند شارێکی ئۆکراینا

سەرۆکایەتی ئەرکانی سوپای ئۆکراینا ڕایگەیاند، سوپای ڕووسیا بەردەوامە لە کشانەوە لە ناوچەکانی کیێڤ و چیرنیهیڤ.

سەرۆکایەتی ئەرکانی سوپای ئۆکراینا لە ڕاگەیەندراوێکدا کە لە هەژماری فەرمیی خۆی لە تۆڕی کۆمەڵایەتیی فەیسبووک بڵاوی کردووەتەوە، ڕەوشی ٣٤مین ڕۆژی جەنگی ڕووسیا و ئۆکراینای خستە ڕوو.

لە ڕاگەیەندراوەکەدا بە تیشک خستنە سەر ئەوەی کە سوپای ڕووسیا نەیتووانیووە شاری کیێڤ گەمارۆ بدات، هاتووە: "سوپای ڕووسیا کە بەردەوامە لە کشانەوە لە ناوچەکانی کیێڤ و چیرنیهیڤ لەوانەیە یەکەکانی لە ڕۆژهەڵاتی وڵات چڕ بکاتەوە".

ئاماژە بەوەشدراوە کە سوپای ڕووسیا بەردەوامە لە هێرشەکانی بۆسەر دۆنێتسک و هێرشی ئاسمانیی و مووشەکیی کراوەتە سەر ناوچەکانی نیشتەجێبوون لە کرێمیننا و ماریۆپول و سەنگەری یەکەکانی سوپای ئۆکرایناش لە نزیک یەکەکانی نیشتەجێبوونی ستێپنۆگۆرسک، ئۆریهۆڤ و ئولیایپۆل تۆپباران کراون.

سوپای ڕووسیا هەروەها هەوڵ دەدات جگە لە ناوچەکانی دەریای ڕەش و دەریای ئازۆف، دەستبەسەر ناوچەکانی نیشتەجێبوون لە ڤۆڵنسک، پۆلینسک، سیڤەرسک، تاڤریچەسکۆی و سلاڤیانسک و شاری ماریۆپولدا بگرێت و یەکەکانی نیشتەجێبوون لە پۆپاسنا و ڕوبیجنە لە ناوچەی لوهانسک کۆنترۆڵ بکات.