دانیشتووانی عێراق لە ماوەی چەند ساڵێکی دیکە دەبێتە دوو هێندە
پەیامی کورد... دانیشتووانی عێراق لە ماوەی چەند ساڵێکی دیکە دەبێتە دوو هێندە
وەزارەتی پلاندانانی عێراق بڵاوی کردەوە، بۆ ساڵی ٢٠٢١ ژمارەی دانیشتووانی عێراق ٤١ ملیۆن و ١٩٠ هەزار کەس بووە، پێشبینیش دەکەن ساڵی ٢٠٥٠ بگاتە دوو هێندە.
لەمبارەیەوە عەبدلزهرە هنداوی وتەبێژی وەزارەتی پلاندانانی عێراق لە چاوپێکەوتنێکی تەلەڤزیۆنیدا ڕایگەیاندووە: زیادبوونی دانیشتووان سروشتییە، کۆی گشتی دانیشتووانی عێراق لە ساڵی ٢٠٢١دا، ٤١ ملیۆن و ١٩٠ هەزار کەس بووە.
ئاماژەی بەوەش کردووە: ژمارەی دانیشتووانی بەغدا ٨ ملیۆن و ٧٥٠ هەزار کەسە و مووسڵ ٤ ملیۆن و بەسرە ٤ ملیۆنە، بەپێی پێشبینییەکان ژمارەی دانیشتووان لە ساڵی ٢٠٥٠ دەگاتە ٨٠ ملیۆن.
هەر سەبارەت بە ڕێژەی لەدایکبوون لە عێراق ئاماژەی بەوەدا و، ڕووی لە کەمبوونەوە کردووە و لە دوو ساڵی ڕابردوودا نزیکەی ٢ ملیۆن و ٦٠٠ هەزار منداڵ لەدایکبوون.