سوپای ئیسرائیل تێکشکاندنی کۆگایەکی چەک لە باشووری سووریا ڕادەگەیەنێت
پەیامی کورد... سوپای ئیسرائیل تێکشکاندنی کۆگایەکی چەک لە باشووری سووریا ڕادەگەیەنێت
سوپای ئیسرائیل، ئەمڕۆ سێشەممە، ئەنجامدانی ئۆپەراسیۆنێکی شەوانەی ڕاگەیاند کە بووەتە هۆی دۆزینەوە و تێکشکاندنی کۆگایەکی چەک و تەقەمەنیی سەر بە ڕێکخراوی "جەماعەتی ئیسلامی" لە ناوچەی گوندی بێت جن، لە باشووری سووریا.
سوپای ئیسرائیل لە بەیاننامەیەکدا وتی: "هێزەکانی فیرقەی ٢١٠ لە ماوەی هەفتەی ڕابردوودا ئۆپەراسیۆنەکەیان ئەنجامداوە، تێیدا بڕێکی زۆر لە ئامێر و کەرەستەی جەنگییان دۆزیوەتەوە کە چەکی جۆراوجۆر، مین و ئامێرەکانی پەیوەندیکردنی لەخۆگرتبوو، و هەر لەو شوێنەدا بە تەواوەتی تێکشکێندران."
وتیشی: "جەماعەتی ئیسلامی بەردەوامە لە ئەنجامدانی ئۆپەراسیۆن دژی ئیسرائیل و هاووڵاتییانی لە بەرەی باکوور، لە چوارچێوەی چالاکییەکدا کە لە کاتی شەڕدا دەستیپێکردووە و تا ئێستاش بەردەوامە."
سوپای ئیسرائیل ڕوونی کردەوە کە ئەم ئۆپەراسیۆنە لە چوارچێوەی زنجیرە ئۆپەراسیۆنێکدایە کە فیرقەی ٢١٠ ئەنجامی دەدات بە مەبەستی "لابردنی هەڕەشە ئەمنییەکان و پووچەڵکردنەوەی چالاکییەکانی توخمە تیرۆریستییەکان لە ناوچەکەدا"، ئەوەش بۆ پاراستنی هاووڵاتییانی ئیسرائیل و دانیشتووانی بەرزاییەکانی جۆلان بە تایبەتی، وەک لە بەیاننامەکەدا هاتووە.
دوێنێ دووشەممەش، سوپای ئیسرائیل دەستگیرکردنی ئەندامێکی دیاری ڕێکخراوی "جەماعەتی ئیسلامی" لە باشووری لوبنان ڕاگەیاندبوو.