وەزیری دادی تورکیا: لە بوومەلەرزەکەی شوباتەوە 351 بەڵێندەر خراونەتە زیندانەوە
پەیامی کورد... وەزیری دادی تورکیا: لە بوومەلەرزەکەی شوباتەوە 351 بەڵێندەر خراونەتە زیندانەوە
وەزیری دادی تورکیا دەڵێت، ژمارەی ئەو کەسانەی بە هۆکاری کەمتەرخەمی لە دروستکردنی باڵەخانە و پابەندنەبوون بە رێنماییەکانەوە لە باکووری کوردستان و تورکیا زیندانیکراون، گەیشتووەتە 351 کەس.
لەمبارەیەوە یڵماز تونچ، وەزیری دادی تورکیا لە کۆنگرەیەکی رۆژنامەڤانییدا لە پارێزگای سەمسووری باکووری کوردستان رایگەیاند: لە بوومەلەرزەکەی مەڕەشەوە 1757 هاووڵاتی دەستبەسەرکراون کە بەڵێندەر بوون و لە ئەنجامی بوومەلەرزەکەدا باڵەخانە دروستکراوەکانیان رووخاون.
یڵماز تونچ گوتی، لەو ژمارەیە 351 گومانلێکراو بە بڕیاری دادگە خراونەتە زیندانەوە.
سەرۆککۆماری تورکیا رۆژی یەکی ئاداری 2023 رایگەیاند: بەهۆی بوومەلەرزەکەی مەرەشەوە لە 11 پارێزگای باکووری کوردستان و تورکیا 203 هەزار و 958 باڵەخانە کە لە 583 هەزار و 628 شوقە پێکدەهاتن، رووخاون و زیانی زۆریان بەرکەوتووە و ئاماژەی بەوەشکرد، ئەوانەی زیانی زۆریان بەرکەوتووە پێویستە بەپەلە بڕوخێندرێن.
بەپێی داتای فەرمییەکان، بەهۆی بوومەلەرزەکەی مەرەشەوە لە هەشت پارێزگای باکووری کوردستان و سێ پارێزگای تورکیا 50 هەزار و 500 کەس گیانیان لەدەستدا.
بوومەلەرزەکە کاریگەریی گەورەیشی لەسەر رۆژئاوای کوردستان و سووریا هەبوو و نزیکەی شەش هەزار کەسیش لەوێ گیانیان لەدەستدا.