ڕوونکردنەوەیەک لە حکوومەتی هەرێمی کوردستانەوە سەبارەت بە سەردانی سەرۆک بارزانی بۆ جزیرێ
پەیامی کورد ... ڕوونکردنەوەیەک لە حکوومەتی هەرێمی کوردستانەوە سەبارەت بە سەردانی سەرۆک بارزانی بۆ جزیرێ
حکوومەتی ھەرێمی کوردستان ڕوونکردنەوەیەکی لەبارەی سەردانی سەرۆک بارزانی بۆ جزیری بۆتانی بڵاوکردەوە و دەڵێت، "لێکدانەوە و خوێندنەوەی جیاواز و نەخوازراو و دوور لە مەبەست ھاتنە ئاراوە، کە دڵگرانی لێکەوتەوە."
دەقی روونکردنەوەکەی حکوومەتی ھەرێمی کوردستان.
سەردانی مێژوویی سەرۆک بارزانی بۆ پارێزگەی شڕناخ و دەڤەری جزیرێ و بەشداریکردنی لە سیمپوزیۆمی مەلای جزیری و دەربڕینی پشتیوانی خۆیان بۆ پرۆسەی ئاشتی و ئەو پێشوازییە گەرمەی کە لە لایەن دامودەزگا فەرمییەکانی حکوومەت و خەڵکی ناوچەکە لە بەڕێزیان کرا، جێگەی سوپاس و پێزانینە.
بەڵام دواتر لێکدانەوە و خوێندنەوەی جیاواز و نەخوازراو و دوور لە مەبەست ھاتنە ئاراوە، کە دڵگرانی لێکەوتەوە.
ئەوەی کە گرینگە ئەوەیە کە سەردەمێکی ناوازە لە پەیوەندییەکانی نێوان کۆماری تورکیا و ھەرێمی کوردستان لە ئارادایە.
پرۆسەی ئاشتیش ھەنگاوێکی درووستە لە چارەسەرکردنی پرسێکی گرینگ و ھەستیار و دەستخۆشی لە حکوومەت و حزبە دەسەڵاتدارەکانی تورکیا و ھەموو لایەک دەکەین کە ڕۆڵی کاریگەریان ھەبووە لە بەرەوپێش بردنی ئاشتی و سەقامگیری لە تورکیا و ناوچەکەدا.
بە پێویستی دەزانین ھەموو لایەکمان بە ھاوکاری یەکتر، ھەوڵی ڕواندنەوەی نیگەرانیەکان بدەین و جەخت لە قووڵترکردنی پەیوەندییەکان و بەدیھێنانی ئاشتەوایی و پاراستنی بەرژەوەندییە ھاوبەشەکانمان و سەقامگیری ناوچەکە بکەین.
حکوومەتی ھەرێمی کوردستان
٢٠٢٥/١٢/٤