قوباد تاڵەبانی هۆکاری سەرکەوتن لە دانووستانەکانی هەرێم و بەغدا ئاشکرا دەکات
پەیامی کورد ... قوباد تاڵەبانی هۆکاری سەرکەوتن لە دانووستانەکانی هەرێم و بەغدا ئاشکرا دەکات
جێگری سەرۆكی ئەنجوومەنی وەزیران لە پەرلەمانی كوردستان رایگەیاند، حكوومەتی ھەرێم پابەند دەبێت بەو ئەركانەی كە لەسەریەتی لە یاسای بوودجەی ٢٠٢١ی عێراق بۆ بەدەستھێنانی ماف و شایستە داراییەكانی ھاووڵاتیان.
ئەمڕۆ دووشەممە قوباد تاڵەبانی، جێگرى سەرۆکی ئەنجوومەنى وەزیران سەرۆکى شاندی دانووستانکارى حکوومەتی هەرێم لەگەڵ ئەندامانی شاندەکە، سەردانی پەرلەمانی کوردستانی کرد و لەلایەن سەرۆکی پەرلەمان و ژمارەیەک لەئەندامانی پەرلەمانەوە پێشوازییان لێ كرا.
دواتر شاندەکە لەگەڵ سەرۆكایەتی پەرلەمان و سەرۆكی فراكسیۆنەكان و لیژنە پەیوەندیدارەكان کۆبوەوە بۆ خستنەڕووى ناوەرۆکى ئەو رێککەوتنەى کە شاندی باڵای حکوومەتی هەرێم لەگەڵ لایەنە عێراقییەکان ئەنجامیان داوە و جێگیرکراوە لەیاساى بوودجەى ٢٠٢١ى عێراق دا.
لەکۆبوونەوەکەدا جێگرى سەرۆکی ئەنجوومەنى وەزیران ئاماژەى بەوەدا کە "ئەم رێکكەوتنە لە دەرئەنجامی کۆبوونەوەکان و لێک تێگەیشتنی نێوانمان بوو کە توانیمان بەڕاست و درووستی زانیارییەکان بگەێنین و زۆر بەڕاشکاوانە گفتوگۆمان کرد لەسەر پرسەکانى تایبەت بەماف و شایستە داراییەکانی هەرێمی کوردستان و پرسی بوودجە و داهات و خەرجییەکان وچۆنییەتی جێگیر كردنی بڕگەیەك لەو یاسایە كە قابیلی جێبەجێ كردن بێت".
قوباد تاڵەبانی باسی لەوەشکرد، "وەك حکوومەتى هەرێمی کوردستان پابەندبوونی خۆمان دەربڕیوە بەجێبەجێکردنی ئەو رێککەوتنە و لایەنە پەیوەندیدارەكانیشمان راسپاردوە بۆ ئەو مەبەستە".