ژنە مامۆستایەکی کورد لە کرماشان دەستبەسەرکرا
پەیامی کورد... ژنە مامۆستایەکی کورد لە کرماشان دەستبەسەرکرا
سەرلەبەیانیی ئەمڕۆ هێزەکانی ئیدارەی ئیتلاعاتی هەڵیانکوتاوەتە سەر ماڵی هاووڵاتییەک بە ناوی فەریدە قەهرەمانیفەر، مامۆستای خانەنشینکراوی بەڕێوەبەرایەتیی پەروەردە و بارهێنانی کرماشان و پەیڕەوی ئایینی یارسان، دەستبەسەریان کردووە.
بەپێی ڕاپۆرتێکی ڕێکخراوی مافی مرۆڤی هەنگاو؛ کاتژمێر ٩: ٠٠ی سەرلەبەیانیی ئەمڕۆ دووشەممە، ٢٧ی خەرمانانی ٢٧٢٣ (١٨ی سێپتەمبەری ٢٠٢٣)، فەریدە قەهرەمانیفەر، تەمەن ٦٤ ساڵ، هاووڵاتیی خەڵکی شاری کرماشان و ئەندامی ئەنجوومەنی فەرهەنگیی خانەنشینکراوان لەو شارە، لەلایەن هێزە حکوومەتییەکانەوە دەستبەسەر کراوە.
بەگوێرەی زانیاریی سەرچاوە ئاگادارەکان، هێزە حکوومەتییەکان هەڵیانکوتایە سەر ماڵی ئەم مامۆستا خانەنشینکراوە لە شاری کرماشان و دوای ئەوەی دەستبەسەریان کردووە، بۆ شوێنێکی نادیاریان گواستووەتەوە.
تاکوو کاتی داڕشتنی ئەم هەواڵە، هیچ زانیارییەکی ورد و دروست لەسەر ئەو تۆمەتانەی کە دراونەتە پاڵ ئەو مامۆستایە لە بەردەستدا نییە.
شایانی باسە کە ئەو هاووڵاتییە لە ماوەی ساڵانی ڕابردوودا چەند جارێک لەلایەن ئیدارەی ئیتلاعات و ئیتلاعاتی سوپای پاسداران لە کرماشان بانگ و لێپرسینەوە و لێپێچینەوەی لێ کراوە.