بە پێی فەرمانێک دەوامی فەرمانبەران زیاد دەکرێت

پەیامی کورد     ...     بە پێی فەرمانێک دەوامی فەرمانبەران زیاد دەکرێت

لیژنه‌ی باڵای ته‌ندرووستی و سه‌لامه‌تی نیشتمانی عێراق رایگه‌یاند، بڕیاردراوه‌ كه‌ ده‌وامی فه‌رمانبه‌ران له‌رێژه‌ی ٢٥%ه‌وه‌ بۆ ٥٠% زیاد بكرێت و هه‌روه‌ها ژماره‌یه‌ك له‌چێشتخانه‌كانیش به‌ره‌چاوكردنی مه‌رجه‌كانی خۆپارێزی بكرێنه‌وه‌.

سه‌رچاوه‌یه‌ك به‌ میدیاكانی عێراقی راگه‌یاندوه‌، لیژنه‌ی باڵای ته‌ندرووستی و سه‌لامه‌تی نیشتمانی بۆ رووبه‌ڕووبوونه‌وه‌ی كۆرۆنا له‌كۆبوونه‌وه‌ی ئه‌مڕۆیدا بڕیاریداوه‌ رێژه‌ی ده‌وامی فه‌رمانبه‌ران بۆ ٥٠% زیاد بكات، هه‌روه‌ها ژماره‌یه‌ك له‌ چێشتخانه‌ و شوێنه‌ گشتیه‌كانیش به‌ره‌چاوكردنی مه‌رجه‌كانی خۆپارێزی له‌ ڤیرووسی كۆرۆنا بكرێنه‌وه‌.

شه‌وی رابردوو، عه‌بدۆلخالق مه‌دحه‌د ئه‌ندامی شانه‌ی ڕووبه‌ڕووبوونه‌وه‌ی قه‌یرانه‌كان له‌ئه‌نجوومه‌نی نوێنه‌رانی عێراق رایگه‌یاندبوو، هه‌وڵێك هه‌یه‌ بۆئه‌وه‌ی ژیان ئاسایی بكرێته‌وه‌ و به‌ره‌چاوكردنی مه‌رجه‌كانی خۆپارێزی ژماره‌یه‌ك له‌ شوێنه‌ گشتیه‌كان بكرێنه‌وه‌ و گۆڕانكاریش له‌ده‌وامی فه‌رمانبه‌ران بكرێت.

پێشتر، لیژنه‌ی باڵای ته‌ندروستی و سه‌لامه‌تی نیشتمانی عێراق رایگه‌یاندبو، به‌رێژه‌ی 25% فه‌رمانبه‌ران ده‌وام ده‌كه‌ن و ژماره‌یه‌ك شوێنیش به‌مه‌به‌ستی خۆپارێزی له‌ ڤایرۆسی كۆرۆنا داخستبو.