بەپەلە ... بەرهەم ساڵح لە بەغدا شاربەدەر دەکرێت !!!

پەیامی کورد   ...    هۆشداری بۆ بەرهەم ساڵح :  لە ئەگەری کۆبوونەوەی بەرهەم ساڵح لەگەڵ دۆناڵد ترامپ " حێزبۆڵڵای عێراقی " شاربەدەری دەکەن .

بەشێك لە لایەنە شیعییەكان فشار دەخەنە سەر بەرهەم ساڵح سەرۆککۆماری عێراق بۆ ئەوەی لە داڤۆس لەگەڵ دۆناڵد ترامپ سەرۆكی ئەمریكا كۆنەبێتەوە، بە ڕاددەیەك، بەرپرسێكی حێزبوڵڵای عێراقی هەڕەشە دەكات و دەڵێت "ئەو كۆبوونەوەیە ئەنجام بدرێت، بەرهەم ساڵح لە بەغدا شاربەدەر دەكەین".
لەكاتێكدا بڕیارە ئەمڕۆ سەرۆککۆماری عێراق لەگەڵ سەرۆكی ئەمریكا لە پەراوێزی كۆڕبەندیی ئابوریی جیهان لە داڤۆس كۆببێتەوە، ئەبو عەلی عەسكەری بەرپرسی ئاسایشی كەتیبەكانی حێزبوڵڵای عیراقی، كە بەشێكە لە حەشدی شەعبی، لە تویتێكدا دەڵێت "دووپاتی دەكەینەوە پێویستە بەرهەم ساڵح پابەندبێت بە كۆنەبوونەوە لەگەڵ ترامپی گەمژە و هاوكارە بكوژەكانی، ئەگەرنا عیراقییەكان هەڵوێستیان دژی دەبێت، ئەویش بەهۆی پێشێلكردنی ئیرادەی گەلی عێراق و لەبەرچاونەگرتنی ئەو خوێنەی ڕژاوە". 
ئاماژەی بەوەشكردوە "ئەگەر بەرهەم ساڵح ئەو كۆبوونەوەیە ئەنجامبدات، ئەوكاتە ئێمە دەڵێین بەخێرنەیەیتەوە، ئازادیخوازانی گەلەكەمان كار لەسەر دەركردنی لە بەغدای سەربەرز و شكۆمەند دەكەن".
پێشتریش حەسەن كەعبی جێگری سەرۆكی پەرلەمانی عیراق، كە سەربە هاوپەیمانی سائیرونی موقتەدا سەدرە، لە ڕاگەێندراوێكدا داوای لە بەرپرسانی عیراق كرد لە داڤۆس بایكۆتی كۆبوونەوەی بەرپرسانی ئەمریكا بكەن، لەسەروی هەموویانەوە دۆناڵد ترامپ سەرۆكی ئەمریكا و مایك پۆمپێئۆ وەزیری دەرەوە.
چەند پەرلەمانتارێكی دیكەی سەربە عەسائیبی ئەهلی حەق و دەوڵەتی یاساش بەهەمانشێوە ئەو فشارەیان لە بەرهەم ساڵح كردوە بۆئەوەی لەگەڵ ترامپ و بەرپرسانی ئەمریكا كۆنەبێتەوە.