بەرپرسانی ئەمریکا و ئەورووپا داوای سزادانی ڕووسیا دەکەن

پەیامی کورد... بەرپرسانی ئەمریکا و ئەورووپا داوای سزادانی ڕووسیا دەکەن

بڕیارەکەی پووتین بۆ داننان بە سەربەخۆیی دوو هەرێمی ئۆکراینا کاردانەوەی نێودەوڵەتیی لێکەوتەوە و ئەمریکا و ئەورووپا و هاوپەیمانەکانیان خۆیان بۆ سزادانی ڕووسیا ئامادە دەکەن.

بوریس جۆنسن، سەرۆک وەزیرانی بەریتانیا ڕایگەیاند؛ لێدوانەکانی پووتین سەبارەت بە سەربەخۆیی هەرێمەکانی دۆنتسک و لۆهانسک پێشێلکردنی سەروەریی خاکی ئۆکراینایە.

لیزا تراس، وەزیری دەرەوەی بەریتانیاش ڕایگەیاند: هەموو ئامادەکارییەک کراوە بۆ ئەوەی ڕووسیا باجی ئەو لێدوانەی پووتین بدات.

وەزارەتی دەرەوەی تورکیاش ڕایگەیاندوە؛ ئەو بڕیارەی پووتین جێی پەسەندکردن نییە و نەگونجاوە.

لای خۆشیەوە جۆزێف بۆڕیڵ، بەرپرسی سیاسەتی دەرەوەی یەکێتی ئەورووپاش ڕایگەیاند؛ ئەورووپا و هاوپەیمانەکانی وەڵامی گونجاویان بۆ پووتین دەبێت.

کۆشکی سپی ڕایگەیاندوە، بە بڕیاری جۆ بایدن، سەرۆکی ئەمریکا مامەڵەی بازرگانی لەگەڵ ئەو دوو هەرێمەی ئۆکراینا قەدەغە کردووە.

ئیمانوێل ماکرۆن، سەرۆکی فەرەنساش ڕایگەیاند: دەبێت ئەورووپا سزای ئامانجدار دژی ڕووسیا و هاوپەیمانەکانی بسەپێنن.

جگە لەوانەش وڵاتانی هاوپەیمانی با کوڕی ئەتڵەسی ناتۆ ئیدانەی بڕیارەکەی پووتینیان کرد، بۆ بە بەفەرمی ناساندنی سەربەخۆیی هەرێمەکانی دۆنتسک و لۆهانسک و ڕایانگەیاند ئەو بڕیارە پووتین بە ئامانجگرتنی یەکێتی خاکی ئۆکراینایە.