زیاترین ڕێژەی تووشبوون بە کۆرۆنا لە هەرێمی کوردستان دەستنیشان کرا

پەیامی کورد ... زیاترین ڕێژەی تووشبوون بە کۆرۆنا لە هەرێمی کوردستان دەستنیشان کرا

وەزیری تەندروستی رایگەیاند کە لە ٢٤ کاتژمێری رابردودا ١٣٠٨ توشبوی کۆرۆنا لە هەرێم تۆمارکراوە، دەشڵێت: ئەوە بەرزترین رێژەى توشبونە لە سەرەتای سەرهەڵدانی ڤایرۆسەکەوە تا ئێستا لە هەرێم تۆمارکرابێت.

د.سامان بەرزنجى وەزیرى تەندروستى حکومەتى هەرێم ئامارى ٢٤کاتژمێرى رابردوى کۆرۆناى لە هەرێم رایگەیاند و ئاماژەى بەوەکرد، ٢٤٦ حاڵەتی چاکبونەوەی تەواوەتی تۆمارکراوە و ١٧ کەس بەهۆی کۆرۆناوە گیانیان لەدەستداوە.

لە کۆنگرەیەکى رۆژنامەوانیدا کە دوای کۆبونەوە لەگەڵ پزیشکانی پسپۆڕی بواری چارەسەری توشبوانی ڤایرۆسی کۆرۆنا و رێکخراوی تەندروستی جیهانیی ئەنجامیدا، وەزیری تەندروستی هەرێم رایگەیاند، لە کۆبونەوەی ئەمڕۆدا کۆمەڵێک راسپاردە و بنەمای زانستی باسکراون، بە بەشداریی  پزیشکان و پسپۆڕانی بواری چارەسەری کۆرۆنا و رێکخراوی تەندروستی جیهانی و بەڕێوەبەرایەتییە گشتییەکان و تیمی وەزارەت.

راشیگەیاند، هاوڵاتیان دەتوانن پاڵپشت و هاوکار بن بۆ روبەڕوبونەوەی ڤایرۆسی کۆرۆنا، داواى لە هاوڵاتیان کرد لە قەرەباڵغی دوربکەونەوە و ماسک ببەستن و هەمو کەس بە گومانلێکراو و توشبو دابنێن.