داعش هێرشی كردە سەر دێرەزوور

پەیامی کورد... داعش هێرشی كردە سەر دێرەزوور


ڕوانگەی سوریا بۆ مافەكانی مرۆڤ ڕایگەیاند، لە ئەنجامی هێرشێكی گروپە چەكدارەكانی داعش لە پارێزگای دێرەزۆر لە ڕۆژهەڵاتی سوریا چوار ئەندامی هێزەكانی سوریای دیموكرات و هاوڵاتیەكی مەدەنی كوژراون.

ڕوانگەكە ڕاشیگەیاند، شانەكانی داعش ئۆتۆمبێلێكی هەسەدەیان لە بازاڕی شارۆچكەی حەویجە لە ڕۆژهەڵاتی دێرەزۆر كردە ئامانج، بەپێی ئامارەكانی ڕوانگەكە، ژمارەی قوربانیانی هەسەدە گەیشتۆتە 4 كەس، هەروەها هاوڵاتیەكی مەدەنیش كوژراوەو كەسێكیش بە سەختی بریندار بووە.

بەپێی ئامارەكانی ڕوانگەكە، لە سەرەتای ساڵی (2023) ەوە، داعش (146) هێرشی لە ناوچەكانی ژێر دەسەڵاتی ئیدارەی خۆسەر ئەنجامداوە، لەوانە هێرشی چەكداری و بۆردومان.

بەپێی داتاو سەرچاوەكانی ڕوانگەی سوریا بۆ مافەكانی مرۆڤ، ئەو جۆرە هێرشانە بوونەتە هۆی گیانلەدەستدانی (120) كەس كە (26) كەسیان خەڵكی مەدەنی بوون.