ئیلهام ئەحمەد: هیوادارین بۆ گفتوگۆی ئاشتی بەرپرسانی تورکیا لە باکووری سووریا ببینین

پەیامی کورد- قامیشلۆ... ئیلهام ئەحمەد: هیوادارین بۆ گفتوگۆی ئاشتی بەرپرسانی تورکیا لە باکووری سووریا ببینین

ئیلهام ئەحمەد، هاوسەرۆکی فەرمانگەی پەیوەندییەکانی دەرەوە لە بەڕێوەبەریی خۆسەر، ڕۆژی شەممە ڕایگەیاند، هیوادارن بەرپرسانی تورکیا لە باکوور و ڕۆژهەڵاتی سووریا ببینن، و دەرفەتی ئەوەشیان هەبێت کە خۆیان بچنە تورکیا، بۆ ئەوەی گفتوگۆ لەسەر ئاشتی بکەن.

ئەحمەد لە میانی بەشداریکردنی لە ڕێگەی ئەپڵیکەیشنی "زووم"ـەوە لە "کۆنفرانسی ئاشتی و کۆمەڵگەی دیموکراتیک" لە ئیستەنبووڵ، وتی: "گرنگتر لە گفتوگۆکردن لەسەر دانانی چەک لەم کاتەدا، گفتوگۆکردنە لەسەر ئاشتی".

ئەو بەرپرسە کوردە جەختی لەوە کردەوە کە سەقامگیری لە سووریا سەقامگیرییە لە ناوخۆی تورکیاشدا، و ڕوونیکردەوە کە بونیادنانی دەوڵەتێکی دیموکراتیک خاوەن دەستوورێک کە مافی هەموو پێکهاتەکان بپارێزێت، ئاسایش لە هەردوو وڵاتدا بەهێز دەکات.

ئیلهام ئەحمەد وتیشی پڕۆسەی ئاشتی لە تورکیا ڕەنگدانەوەی ڕاستەوخۆی هەبووە لەسەر باکوور و ڕۆژهەڵاتی سووریا، "بەو پێیەی هێرشەکان وەستاون و ئەگەری کردنەوەی کەناڵەکانی گفتوگۆ لەگەڵ دەوڵەتی تورکیا دەرکەوتووە بۆ چارەسەرکردنی کێشەکان لە ڕێگەی لێکتێگەیشتنەوە".

ئاماژەی بەوەشدا کە پێکهاتەکانی باکوور و ڕۆژهەڵاتی سووریا بۆ چەندین دەیەی درێژ لەژێر سایەی ڕژێمی پێشوودا لە مافەکانیان بێبەش بوون، و ئەم قۆناغەی ئێستا دەرفەتێکە بۆ بونیادنانی سووریایەکی نوێ لەسەر بنەمای دیموکراسی و ئاشتیی بەردەوام.

وتیشی: "ئێمە لە لایەنگرانی دابەشکردنی وڵاتان نین، نە لە سووریا و نە لە هیچ شوێنێکی دیکە، چونکە دابەشکردن دەبێتە هۆی هەڵگیرسانی جەنگی زیاتر".

ئیلهام ئەحمەد ئاماژەی بەوە کرد کە تورکیا توانای هەیە ئەو دەنگانە کەم بکاتەوە کە بانگەشە بۆ جەنگ و ململانێ دەکەن، بەتایبەتی کە ڕۆڵێکی تەوەرەیی هەیە لە سووریا لە ڕێگەی پەیوەندییەکانی لەگەڵ حکومەتی کاتیی سووریا و کەناڵەکانی پەیوەندی لەگەڵ بەڕێوەبەریی خۆسەر.

ئەحمەد ئەوەشی خستەڕوو کە خوازیار بوو بەشێوەی حزوری لە کۆنفرانسەکەدا بەشدار بێت، "بەڵام زەیهنییەتی قبوڵنەکردن" ڕێگر بوو لەوە.