هێرشی پێچەوانەی ئۆکرانیا خاوترە

پەیامی کورد... هێرشی پێچەوانەی ئۆکرانیا خاوترە

بەرپرسێکی باڵای پنتاگۆن رایگەیاند، هێرشی پێچەوانەی ئۆکرانیا بۆ سەر هێزەکانی ڕوسیا بە خێراییەکی خاوتر لەوەی چاوەڕوان دەکرا بەڕێوەدەچێت، بەڵام هێشتا زووە بۆ ئەوەی ئەنجامەکان لەبارەی ئاسۆی کیێڤ بۆ دەستکەوتەکانی لە بەرەکانی شەڕدا رابگەیەنرێت.

ئەمریکا و هاوپەیمانەکانی دیکە چەند مانگێکیان تێپەڕاندوە بۆ ڕاهێنانی هێزەکانی ئۆکرانیا لە تەکنیکەکانی چەندین جۆر چەک بۆ یارمەتیدانی کیێڤ بۆ چونە ناو بەرگرییە ترسناکەکانی ڕوسیا لە کاتی دژە هێرشەکانیدا، بەڵام ڕوسیا چەند مانگێک خەریکی هەڵکەندن و بەهێزکردنی پێگەکانی بو بۆ رێگریکردن لە پێشکەوتنی ئۆکرانیا لە رۆژهەڵات و باشوردا.

کۆڵین کاهل، یاریدەدەری وەزیری بەرگری ئەمریکا لە لێدوانێکی ڕۆژنامەوانیدا وتی، "هێشتا زووە حوکم لەسەر ڕەوتی هێرشی دژە هێرشی ئۆکرانیا بدرێت".

باسی لەوەشکرد، ئەوان هێشتا خەریکی تاقیکردنەوەی هێڵەکانی ڕوسیا و ناوچەکانی ڕوسیان بۆ زانینی لاوازییەکان.

ئەم لێدوانەی یاریدەدەری وەزیری بەرگری لە کاتێکدایە کە دابینکردنی بۆمبی کلاستەری ڕاگەیاند، کە پنتاگۆن هیوادارە یارمەتیدەر بێت بۆ دڵنیابون لەوەی ئۆکرانیا هێزی شەڕی پێویستی هەبێت.

یاریدەدەری وەزیری بەرگری وتیشی، "ئێمە دەمانەوێت دڵنیابین لەوەی ئۆکرانییەکان تۆپخانەی پێویستیان هەیە بۆ ئەوەی لە چوارچێوەی هێرشی دژە هێرشی ئێستادا بەردەوام بن لە شەڕکردن، هەروەها لەبەر ئەوەی شتەکان کەمێک خاوتر لەوە دەڕۆن کە چاوەڕوانی بوین".

هەندێک لە بەرپرسانی ئەمریکی کە نەیانویست ناویان ئاشکرا بکرێت، گەشبینی خۆیان دەربڕی کە کیێڤ هەمو ئەو چەکانەی کە پێویستی پێیەتی، لەوانە ئامێری پاککردنەوەی مین و ئامێری مینڕێژ یارمەتی دەدات بۆ خێراکردنی پێشڕەوییەکانی.

هەروەها ڕەنگە ئۆکرانیا دەرفەتێکی ناوازەی هەبێت دوای یاخیبونی چەکداری یڤگنی پریگۆژین، سەرۆکی گروپی سەربازی تایبەتی ڤاگنەر، کە بەرپرسانی ئەمریکی دەڵێن کاریگەرییە وێرانکەرەکانی شەڕی سەرۆک ڤلادیمێر پوتن لە ئۆکرانیا ئاشکرا کرد.