لە بنکەیەکی سەربازیی ئێران سەربازێک پێنج هاوڕێی خۆی کوشت

پەیامی کورد... لە بنکەیەکی سەربازیی ئێران سەربازێک پێنج هاوڕێی خۆی کوشت

شەوی رابردوو لە شاری کرمانی باشووری ئێران، سەربازێکی ئێرانی، لەنێو سەربازگەیەکدا، پێنج سەربازی تری هاوڕێی کوشت و هەڵات.

ئاژانسی هەواڵی (ئێرنا) کە دەزگایەکی میدیایی رەسمیی کۆماری ئیسلامیی ئێرانە، لە زاری فەرماندەیەکی سەربازیی ئێرانەوە بڵاوی کردەوە، ئەو سەربازەی هێرشەکەی کردووە، لە کاتی نۆرە پاسەوانیی خۆیدا بووە و لەناکاو خۆی کردووە بە هۆڵی حەوانەوەی سەربازەکانی هاوڕێیدا و بە دەستڕێژی گوللە، پێنج سەربازی یەکە سەربازییەکەی کوشتووە و پاشان هەڵاتووە و تا ئامادەکردنی ئەم هەواڵ دەستگیر نەکراوە.

ئیرنا ئاماژەی بەوەش داوە کە تاوەکوو ئێستا هۆکاری ئەو هێرشە نەزانراوە و هێزە ئەمنیەکان بەدوای سەربازە هێرشبەرەکەدا دەگەڕێن.

جێی باسە بڵاوبوونەوەی ئەو هەواڵە، وەک بەشێک لە میدیاکان باسی دەکەن، ترس و دڵەڕاوکێی خستووەتە دڵی هەم خەڵک و هەم ریزەکانی سوپاوە و گەلێکیان دەیبەستنەوە بە رووداوی دوو تەقینەوەکەی نزیک گۆڕی فەرماندەی پێشووی سوپای پاسداران قاسم سولەیمانی کە سەرەتای ئەم مانگە هەر لە هەمان شار (کرمان) رووی دا و پێیانوایە گرووپی چەکداریی توندڕەو لەپشت ئەو رووداوەوە بن، بەڵام جارێ گەڕان و لێکۆڵینەوە بەردەوامە.