ووتەبێژی وەزارەتی دەرەوەی ئێران بە تووندی ووڵامی قسەکانی ئەمڕۆی بۆڵتۆن دەداتەوە

پەیامی کورد  ...   ووتەبێژی وەزارەتی دەرەوەی ئێران ڕایگەیاند جۆن بۆڵتۆن، راوێژکاری ئاسایشی نیشتمانی کۆشکی سپی  بەرامبەر ئێران توشی وەهمێکی بەردەوام بووە.

بەهرام قاسمی ووتەبێژی وەزارەتی دەرەوەی ئێران ، لەلێدوانێکدا بۆ میدیای فەرمی ووڵاتەکەی ووڵامی دەنگۆکانی بۆڵتۆنی دایەوە کەسەبارەت بە ووڵاتەکەی بڵاوی کردبوویەوەو ڕەخنەی تووندی لێگرت.

هەروەها قاسمی ووتی، “بۆڵتۆن تووشی وەهمێکی هەمیشەیی بووە بەرامبەر ئێران و گەلی ئێران، لەبڕی ئەوەی لە شۆڕشی ئێران تێبگات، بەردەوامە لە هەڵوێستە دوژمنکارەکانی و بۆ جێبەجێ کردنی ئەو بۆچوونانەی کە سەرکەوتنیان بەدەست نەهێناوە هەوڵی بەڵێنی بەتاڵ دەدات”.

جۆن بۆڵتۆن، راوێژکاری ئاسایشی نیشتمانی کۆشکی سپی  لە تویتێکدا پەیامێکی ڤیدیۆیی بڵاو کردبوویەوە و بەئاشکرا هەڕەشەی لە ئیدارەی ئێران کردبوو.

جێگای ئاماژەیە، بۆڵتۆن ئاماژەی بەوەدابوو کە ئێران بەردەوامە لە دابینکردنی سەرچاوەی دارایی تیرۆریزمی نێودەوڵەتی لە رۆژهەڵاتی ناوەڕاستی و یەمەن وعێراق و سووریادا و ووتبووی، “لەو بڕوایەدانیم کە لەمەودوا ساڵیادی زۆرتان لەبەردەمدابێت تاکو پیرۆزی بکەن”.