شاندی هه‌رێمی كوردستان به‌ره‌و به‌غدا به‌ڕێكه‌وت

پەیامی کورد... شاندی هه‌رێمی كوردستان به‌ره‌و به‌غدا به‌ڕێكه‌وت


شاندی حكومه‌تی هه‌رێمی كوردستان به‌ره‌و به‌غدا به‌ڕێكه‌وت بڕیاره‌ له‌گه‌ڵ محه‌مه‌د شیاع سودانی، سه‌رۆك وه‌زیرانی عێراق كۆببنه‌وه‌.

وەزارەتی دارایی و ئابووری حکومەتی هەرێمی کوردستان رایگەیاند: "ئەمڕۆ دووشەممە 27ی تشرینی دووه‌می 2023، شاندی هەرێمی کوردستان بە سەرۆکایەتی ئاوات شێخ جەناب، وەزیری دارایی و ئابووری هەرێمی کوردستان و د. ئومێد سەباح، سەرۆکی دیوانی ئەنجومەنی وەزیران، د. ئامانج رەحیم سکرتێری ئەنجومەنی وەزیران و د. عەبدولحەکیم خەسرۆ، سەرۆکی فەرمانگەی هەماهەنگی و بەدواداچوون و خالید هادی چاوشلی، راوێژکار لە ئەنجومەنی وەزیران بەرەو شاری بەغد بەڕێکەوتن".

وەزارەتی دارایی راشیگەیاندووە: "بڕیارە شاندەکە لەگەڵ محەمەد شیاع سودانی، سەرۆکوەزیرانی عێراق کۆببنەوە، پرسی مووچەی فەرمانبەرانی هەرێمی کوردستان، هەموارکردنەوەی یاسای بودجە و پرۆسەی هەناردەکردنەوەی نەوتی هەرێمی کوردستان لە گرنگترین تەوەرەکانی کۆبونەوەکە دەبن".

ئومێد سەباح سەرۆکی دیوانی ئەنجومەنی وەزیرانی هەرێمی کوردستان، پێشتر رایگەیاندبوو: "گفتوگۆمان لەگەڵ سەرۆکوەزیرانی عێراق، زیاتر لەسەر مووچەی مووچەخۆرانی هەرێمی کوردستان دەبێت، ئێمە لەژێر رێنماییەکانی سەرۆکی حکومەت هەوڵدەدەین شایستە داراییەکان و مافە دەستوورییەکانی خەڵکی کوردستان بپارێزین".

سەبارەت بە هەناردەکردنەوەی نەوتی هەرێمی کوردستان، وتی: "بڕیارە لە سەرەتای مانگی داهاتوو، سەردانی بەغدا بکەین و کۆبوونەوەیەکی دیکە لەو بارەوە لەگەڵ بەرپرسانی حکومەتی فیدراڵی بکەین".