سوید، یەکەم داواکراوی ڕادەستی تورکیا کرد

پەیامی کورد   ...  سوید ، یەکەم داواکراوی ڕادەستی تورکیا کرد

پاش پەیمانی نێوان ووڵاتانی تورکیا، سوید و فینلەندا؛ سوید ڕازی بوو یەکەم داواکراوی تورکیا ڕادەستی ئەو ووڵاتە بکاتەوە .

حکوومەتی سوید ڕۆژی پێنجشەممە ڕێکەوتی١١ی ئۆگۆست ، ڕایگەیاند ئامادەیە هاووڵاتییەکی داواکراوی تورکیا ڕادەستی ئانکارا بکاتەوە.

ئەم هاووڵاتییە بەڕەچەڵەک تورکە "ئۆکان کالییە" تەمەن ٣٥ ساڵ و لەلایەن دەوڵەتی تورکیا تۆمەتبار کراوە کە ساختەکاری لە کارتی بانکی کردووە و لە نێوان ساڵانی ٢٠١٣ بۆ ٢٠١٦ ساختەکاری لە کارتی دڵنیایی کردووە و بە بێ ئامادەبوونی خۆی، دادگای تورکیا حوکمی ١٤ساڵ بەندکرانی بەسەریدا سەپاندووە.

بەڵام ئۆکان کالیە لە بەرامبەردا ووتوویەتی: تورکیا تاوانی درۆی خستووەتە پاڵم، دەستبەسەرم دەکات چوونکە دایکم کوردە و سەربازیم نەکردووە و دینیشم لە ئیسلام بۆ کریستیان گۆڕیوە.

دەوڵەتی سوید ڕایگەیاندووە لەئەگەری ڕادەستکردنی ئەم هاووڵاتییە هیچ مەترسییەک لەسەر گیانی نابێ.

ئەردۆغان پێشتر دوو دەوڵەتی سوید و فینلەندای وەکوو پێگەی تیرۆریستان ناوبردبوو و هەڕەشەی لەو ووڵاتانە کردبوو ئەگەر بێت و داواکراوان ڕادەستی تورکیا نەکەن، ئەوە ڕێگە ناداتە ئەو ووڵاتانە ببنە ئەندامی ناتۆ.

ئەردوغان ئاشکرای کردووە دەوڵەتی سوید بەڵێنی داوە ٧٣ کەسی داواکراو ڕادەستی تورکیا بکات