سوپای ئەمریکا هۆشداری توند دەداتە ئێران

سوپای ئەمریکا، وەک کاردانەوەی بەرامبەر بە هەڕەشەکانی ئێران بۆ داخستنی گەرووی هۆرمۆز، ڕایگەیاند و هۆشداریدا ئەم گەرووە دەبێ بە ڕووی نەوتکێشەکان کراوە بێت و ئەمریکا و هاوپەیمانانی لەم بارەوە ئامادەیی تەواویان هەیە.

کاپیتان بیل ئۆربان، گوتەبێژێکی ناوەندی فەرماندەی سوپای ئەمریکا بە ئاژانسی ئاسۆشەیتێدپرێسی گوتووە: هێزی دەریایی ئەمریکا و هاوپەیمانانی لە ناوچەکە ئامادەن ئازادی هاتووچۆی کەشتییە نەوت هەڵگرەکان بەپێی یاسا نێودەوڵەتیەکان مسۆگەر بکەن.

لە ڕۆژانی ڕابردوو، حەسەن روحانی، سەرۆککۆماری ئێران و فەرماندەکانی سوپای پاسداران و قاسم سولەیمانی، فەرماندەی سوپای قودسی ئێڕان، هەڕەشەی داخستنی گەرووی هۆرمۆزیان کردووە، ئەگەر بێتوو ئەمریکا ڕێگە لە هەناردەکردنی نەوتی ئێران بگرێت.