لە سەر فەرمانی مەسروور بارزانی لایەنە حکوومییەکانی بۆ گەڕاندنەوەی قوتابی و هاووڵاتیانی هەرێم ڕاسپێردران

پەیامی کورد    ...    سەرۆکی حکوومەتی هەرێمی کوردستان، لایەنە حکوومییەکانی بۆ گەڕاندنەوەی قوتابی و هاووڵاتیانی هەرێم راسپارد

مەسروور بارزانی، سەرۆکی حکوومەتی هەرێمی کوردستان، لایەنە پەیوەندیدارەکانی حکومەتی راسپارد کە هەموو هەوڵەکانیان بۆ گەڕاندنەوەی قوتابیان و هاووڵاتیانی هەرێمی کوردستان لە دەرەوەی ووڵات بخەنەگەڕ.
وەزارەتی گواستنەوە و گەیاندنی حکوومەتی هەرێمی کوردستان بڵاویکردەوە، لە سەر فەرمانی مەسروور بارزانی سەرۆکی حکوومەتی هەرێمی کوردستان، هەموو هەوڵەکانی " وەزارەتی گواستنەوە و گەیاندن و فەرمانگەی پەیوەندیەکانی دەرەوە و نوێنەراییەتەکانی هەرێم لە دەرەوە و وەزارەتی خوێندنی باڵا و تۆژینەوەی زانستی و نوێنەرایەتی حکوومەتی هەریم لە بەغدا " خرایەگەڕ لە پێناو گەڕاندنەوەی قوتابیان و هاووڵاتیانی کوردستانی لە دەرەوەی هەرێم بە هەماهەنگی لەگەڵ حکوومەتی فیدراڵ، هەنگاوەکان بەرەو گەڕاندنەوەی هاووڵاتیانی هەرێم بەردەوامن.
‌راگه‌ێندراوه‌كه‌ى وه‌زاره‌تى گواستنەوە و گەیاندن ئاماژەشی پێداوە، جەخت لە سەر ئەوە دەکەینەوە کەوا، دەبێت هاووڵاتیان لە هەر ووڵاتێک بن، پابەندی یاسا و رێنماییەکانی ئەم وڵاتە بن و ناوی خۆیان تۆمار بکەن لە نزیکترین باڵیۆزخانە، کونسوڵگەری عێراقی، یاخود نوێنەرایەتی حکوومەتی هەرێم و رێنماییەکانیان جێبەجێ بکەن.
وەزارەتی گواستنەوە و گەیاندن روونیکردووەتەوە، هەروەها هاووڵاتیان هان دەدەین کە لەم کاتانەی فڕۆکەخانەکان و فڕۆکەکان بووینە شوێنی سەرەکی گواستنەوەی ئەم ڤیرووسە و نەخۆشیە گوێزەرەوە کوشندەیە کە هەموو توانایان بخەنە گەڕ بۆ مانەوەیان لە شوێنی خۆیان تاکوو تێپەربوونی ئەم دۆخە دژوارەدا، بە هیوای تەندرووستیيەکی باش بۆ هەموو لايه‌ك.